بۇگىن "جەلتوقسان الماتى" قوعامدىق بىرلەستىگىنىڭ مۇشەلەرى ساياسي قۋعىن-سۇرگىن جانە اشارشىلىق قۇرباندارى كۇنىنە قۇرمەت رەتىندە ۇلت ۇستازى – احمەت بايتۇرسىن ۇلىنىڭ ەسكەرتكىشىنە تاعزىم ەتىپ، گۇل شوقتارىن قويدى.
ودان سوڭ الماتى ىرگەسىنەن ورىن تەپكەن تالعار قالاسىندا (الماتى وبلىسى) ورناتىلعان "باتىرلار اللەياسىنا" دا ارنايى بارىپ، القىزىل گۇلدەر تولى سەبەت قويدى.
– ءبىز قازاقتىڭ بەتكە ۇستار قايماقتارىنىڭ كوزىن جويۋعا ۇمتىلعان سوناۋ كەڭەستىك جۇيەنىڭ قيتۇرقى ساياساتىن، قولدان ۇيىمداستىرىلعان اشارشىلىق ناۋبەتتى قالاي ۇمىتامىز؟! ودان بەرگىدە ورىن العان جەلتوقسان وقيعاسى دا ءبىر كەزدەرى ساياسي باسقىنشىلىققا قارسى تۇرعان الاش قايراتكەرلەرىنىڭ ءىزىن جالعاعان، تاۋەلسىزدىكتى ارمانداعان جاستاردىڭ جانايقايى بولاتىن. ءبىزدىڭ قوعامدىق بىرلەستىكتىڭ 700-دەن استامى مۇشەسى، الماتىنىڭ بارلىق سەگىز اۋدانىندا جەتەكشىلەرى بار. بيىل دا جىلداعى داستۇرىمىزدەن جاڭىلماي، ساياسي قۋعىن-سۇرگىن قۇرباندارىنا اس بەرىپ، قۇران باعىشتادىق، – دەيدى "جەلتوقسان الماتى" قوعامدىق بىرلەستىگىنىڭ ءتوراعاسى سەرىكبەك جاندىباي.
