مەرەكە كۇندەرى جۇمىس ىستەۋ ادامنىڭ دەنساۋلىعىنا كەرى اسەر ەتۋى مۇمكىن.
بۇل تۋرالى رەسەي دەنساۋلىق ساقتاۋ مينيسترلىگىنە قاراستى ۆ.پ. سەربسكيي اتىنداعى ۇلتتىق پسيحياتريا جانە ناركولوگيا عىلىمي-زەرتتەۋ ورتالىعىنىڭ مامانى يۆان روزانوۆ مالىمدەدى، دەپ حابارلايدى aqshamnews.kz.
ماماننىڭ ايتۋىنشا، مەرەكەلەر — ادامنىڭ تىنىعۋىنا، ەموسيالىق قالپىن قالپىنا كەلتىرۋىنە جانە جاقىندارىمەن قارىم-قاتىناسىن نىعايتۋعا مۇمكىندىك بەرەتىن ماڭىزدى كەزەڭ. ال بۇل كۇندەرى جۇمىس ىستەۋ ادام اعزاسىنىڭ بەيىمدەلۋ مۇمكىندىكتەرىن السىرەتىپ، كۇيزەلىسكە قارسى تۇرۋ قابىلەتىن تومەندەتەدى.
روزانوۆ مەرەكەنىڭ ءتىپتى سوعىس كەزىندە دە اتاپ وتىلەتىنىن ەسكە سالىپ، قازىرگى قوعامدا بۇل كۇندەر گادجەتتەردەن الىستاپ، ۇيقىنى قالپىنا كەلتىرىپ، سۇيىكتى ىسپەن اينالىسۋعا مۇمكىندىك بەرەتىنىن اتاپ ءوتتى. مۇنداي ارەكەتتەر جۇيكە جۇيەسىن تىنىقتىرىپ، ادامنىڭ جالپى پسيحيكالىق جاعدايىن جاقسارتادى.
عالىمدار ادامنىڭ ومىرىندە ءبىرسارىندىلىقتىڭ (مونوتوندىقتىڭ) ءجيى كەزدەسەتىنىن، ال ول ءوز كەزەگىندە ۇزاق مەرزىمدى كۇيزەلىسكە الىپ كەلۋى مۇمكىن ەكەنىن ايتادى. مەرەكە كۇندەرى — وسى ءبىرسارىندىلىقتى بۇزىپ، ادامنىڭ ومىرگە دەگەن قىزىعۋشىلىعىن ارتتىرۋدىڭ ءبىر جولى.
سونداي-اق مەرەكە كەزىندەگى قۋانىش پەن جاعىمدى ەموسيالار اعزادا سەروتونين مەن دوفامين سياقتى «باقىت گورموندارىنىڭ» بولىنۋىنە ىقپال ەتىپ، موتيۆاسيا مەن ومىرلىك بەلسەندىلىكتى ارتتىرادى. تابيعات اياسىندا، جاقىندارمەن بىرگە وتكىزىلگەن ۋاقىت مي قىزمەتىن جاقسارتىپ، زەيىندىلىكتى كۇشەيتەدى.