الماتى اكىمىنىڭ ورىنباسارى بەيبىت شاحانوۆ پاريجدەگى جازعى وليمپيادا ويىندارىندا مەدال جەڭىپ العان سپورتشىلارعا پاتەر كىلتتەرىن تابىس ەتتى، دەپ حابارلايدى aqshamnews.kz
بەس سپورتشى جاڭا پاتەر يەگەرلەرى اتاندى. سپورتتىق گيمناستيكادان وليمپيادانىڭ كۇمىس جۇلدەگەرى ناريمان قۇربانوۆ ەكى بولمەلى پاتەر الدى.
قولا جۇلدەگەرلەر — بوكستان سپورتشى نازىم قىزايباي مەن اتقىش يسلام ساتبايەۆ ءبىر بولمەلى پاتەر يەگەرلەرى اتاندى.
قولا مەدال يەگەرلەرى، دزيۋدوشى گۋسمان قىرعىزبايەۆ جانە پنيەۆماتيكالىق مىلتىقتان اتۋ سپورتشىسى الەكساندرا لە جاتتىعۋ جيىندارى مەن حالىقارالىق جارىستاردا. ولارعا پاتەرلەر كىلتتەرى الماتىعا ورالعاننان سوڭ بەرىلەدى.
«ءسىزدىڭ جەڭىستەرىڭىز-كوپ جىلعى قاجىرلى ەڭبەكتىڭ ناتيجەسى جانە سپورتشىلاردىڭ جاڭا بۋىنى ءۇشىن لايىقتى ۇلگى. الماتى سىزدەردىڭ جەتىستىكتەرىڭىزدى جوعارى باعالايدى جانە سىزدەردى جاڭا جەتىستىكتەرگە جەتۋ جولىندا ۇنەمى قولدايتىن بولادى»، — دەدى بەيبىت شاحانوۆ.
ءوز كەزەگىندە سپورتشىلار نيەت پەن كورسەتىلگەن قولداۋعا العىستارىن ءبىلدىردى.
انىقتاما: 2024 جىلدىڭ 11 تامىزىندا پاريجدە XXXIII جازعى وليمپيادا ويىندارى اياقتالدى. الماتىلىق سپورتشىلار ءبىرقاتار مەدالداردى جەڭىپ الدى جانە حالىقارالىق ارەنادا ەلىمىزدىڭ سپورتتىق بەدەلىن نىعايتتى ءارى قازاقستاندى ابىرويمەن الەمگە پاش ەتتى.
20 تامىزدا الماتى قالاسىنىڭ اكىمدىگىندە وليمپيادا جۇلدەگەرلەرىمەن سالتاناتتى كەزدەسۋ ءوتتى. ءىس-شارا اياسىندا سپورتشىلارعا اقشالاي سەرتيفيكاتتار، اۆتوكولىك كىلتتەرى، سونداي-اق تۇرعىن ءۇي الۋعا سەرتيفيكاتتار تابىس ەتىلدى. كەزدەسۋ كەزىندە الماتى اكىمدىگىنەن اقشالاي سىيلىقتار مەن اۆتوموبيلدەر تابىستالدى.
تۇرعىن ءۇي بەرۋگە كەلەتىن بولساق، جۇلدەگەرلەرگە بەرىلگەن سەرتيفيكات تيتۋلدى سپورتشىلاردى پاتەرلەرمەن قامتاماسىز ەتۋ تەتىگىنىڭ ءبىرىنشى كەزەڭى بولىپ تابىلادى. سەرتيفيكاتتار تاپسىرىلعاننان كەيىن تۇرعىن ءۇي ساتىپ الۋ ءراسىمى ىسكە قوسىلدى. بۇل پروسەسس جەكە بيۋدجەتتى قالىپتاستىرۋدى جانە كونكۋرس جاريالاۋدان باستاپ شارتتار جاساسۋعا دەيىنگى بارلىق قاجەتتى مەملەكەتتىك ساتىپ الۋ راسىمدەرىن وتكىزۋدى قامتيدى. بۇل پروسەدۋرالار زاڭنامامەن قاتاڭ رەتتەلەدى جانە بەلگىلى ءبىر ۋاقىتتى قاجەت ەتەدى.
2025 جىلدىڭ 9 قاڭتارىندا بارلىق زاڭدى جانە ساتىپ الۋ پروسەدۋرالارى اياقتالدى. سپورتشىلاردىڭ جايلى ءومىر ءسۇرۋ جاعدايلارىن قامتاماسىز ەتۋ ءۇشىن پاتەرلەردە ارلەۋ جۇمىستارى جۇرگىزىلدى. سپورت باسقارماسىنىڭ قىزمەتكەرلەرى وسى ۋاقىت ىشىندە ءار جۇلدەگەرمەن بايلانىستا بولدى جانە كىلتتەردى تاپسىرۋ كۇنى ارقايسىسىمەن كەلىسىلدى.