قازاقستان رەسپۋبليكاسىنىڭ مادەنيەت جانە اقپارات مينيسترلىگىنىڭ قولداۋىمەن جامبىل اتىنداعى قازاق مەملەكەتتىك اكادەميالىق فيلارمونياسى مەن ب.بايقاداموۆ اتىنداعى مەملەكەتتىك حور كاپەللاسىنىڭ 90 جىلدىعى اياسىندا قازاقستان حالقى اسسامبلەياسىنىڭ 30 جىلدىعىنا ارنالعان «گۇل الماتى.
«Flower city» فەستيۆالىنىڭ-كونسەرتى ءوتتى، دەپ حابارلايدى aqshamnews.kz.
فيلارمونيادا بيىل ءداستۇرلى تۇردە ءتورتىنشى جىل قاتارىنان وتكىزىلىپ وتىرعان فەستيۆالدىڭ ماقساتى - ەلىمىزدەگى بالالار حورىن دامىتىپ، جاس تالانتتاردىڭ تانىلۋىنا ىقپال ەتۋ. فەستيۆالدە قازاق ۇلتتىق قىزدار پەداگوگيكالىق ۋنيۆەرسيتەتىنىڭ قىزدار حورى ارنايى قوناق بولىپ، كونسەرتتە ونەر كورسەتتى.
-بۇگىن فيلارمونيامىزدىڭ ۇلكەن زالىندا ءداستۇرلى تۇردە ءتورتىنشى رەت «گۇل الماتى» فەستيۆالىنىڭ كونسەرتى ءوتىپ جاتىر. فەستيۆالگە قالامىزداعى ەڭ ۇزدىك، كاسىبي دەڭگەيلەرى بيىك بالالار حورى ونەرلەرىن كورسەتتى. مەملەكەتتىك حور كاپەللاسى ءارقاشان بالالارعا قولداۋ بەرەر فەستيۆالدى قۋانا-قۋانا وتكىزەمىز. گۇل الماتىمىز وركەندەي بەرسىن، - دەيدى قازاقستاننىڭ ەڭبەك سىڭىرگەن قايراتكەرى بەيىمبەت دەمەۋوۆ.
فەستيۆال قاتىسۋشىلارى «قوӊىراۋ» كىشى حورى، «كوكەك» بالالار حورى، «اق تىلەك» ۇلدار حورى جانە تاعى دا باسقا بالالار مەن جاسوسپىرىمدەردىڭ ورىنداۋشىلار توبى ءىرى ۇجىم ب.بايقاداموۆ اتىنداعى مەملەكەتتىك حور كاپەللاسىمەن ءبىر ساحنادا ونەر كورسەتتى.
-فەستيۆالگە ءبىز 2023ء-شى جىلدان بەرى شاقىرتۋ الىپ، بالالار ءوز ونەرلەرىن كورسەتىپ كەلەدى. ءداستۇرلى تۇردە بولعاندىقتان، ءبىز ساعىنا، ۇلكەن دايىندىقپەن كۇتەمىز. ءوزىمنىڭ جانە «اق تىلەك» بالالار حورى اتىنان ۇيىمداستىرۋشىلارعا العىس بىلدىرەمىن. ءجاسوسپىرىم تالانتتارعا قولداۋ بەرەر «گۇل الماتى» فەستيۆالىنىڭ عۇمىرى ۇزاق بولسا ەكەن دەگەن تىلەك بىلدىرەمىن، - دەيدى ا.جۇبانوۆ اتىنداعى دارىندى بالالارعا ارنالعان رقمممي «اق تىلەك» ۇلدار حورىنىڭ جەتەكشىسى اينۋرا ۋاليحان قىزى.
فەستيۆال – تەك كونسەرت ەمەس، بۇل – بالالار مەن جاسوسپىرىمدەردىڭ بويىنداعى شىعارماشىلىقتى وياتاتىن، ولاردى ساحنا مادەنيەتىنە، ءوزارا دوستىق پەن ىنتىماققا باۋليتىن تاربيەلىك ءمانى زور ونەر مەرەكەسى. حالىقتار دوستىعى، بەيبىتشىلىك پەن بىرلىك، دارىندى جاس ۇرپاقتىڭ بولاشاعىنا سەنىم — مەرەكەلىك كەشتىڭ نەگىزگى يدەياسى بولدى.
ء-بىز بۇگىنگى فەستيۆالدە موسارتتىڭ، اباي قۇنانبايەۆتىڭ «جەلسىز تۇندە جارىق اي» شىعارماسىن ورىندايمىز. فەستيۆالگە بيىل دا قاتىساتىنىمىزدى ەستىگەندە قۋانىپ، قىزۋ دايىندىقپەن كەلدىك، - دەيدى «اق تىلەك» ۇلدار حورىنىڭ ورىنداۋشىسى زياش ابدۋللاكبار.
كونسەرتتىك باعدارلامادا قازاق جانە الەم كلاسسيكتەرىنىڭ تۋىندىلارى، زاماناۋي اۆتورلىق كومپوزيسيالار مەن ءتۇرلى ەتنوستاردىڭ مۋزىكالىق مۇراسى ورىندالدى. كونسەرت سوڭىندا فەستيۆالگە قاتىسۋشى بارلىق ۇجىمدارعا ۇيىمداستىرۋشىلار اتىنان العىس حات پەن ارنايى سىيلىقتار تابىس ەتىلدى. قارا شاڭىراق قابىرعاسىندا ءالى دە ءجاسوسپىرىم تالانتتاردىڭ ونەر جولىنا قولداۋ بەرەر جوبا جالعاسىن تاباتىن بولادى.