قازاقستان رەسپۋبليكاسى تاۋەلسىزدىگىنىڭ 30 جىلدىق مەرەيتويىن اتاپ ءوتۋ اياسىندا سينگاپۋردا قالا تۇرعىندارى مەن تۋريستتەر اراسىندا كەڭىنەن تانىمال «Gardens by the Bay» (شىعاناقتاعى باقتار) ساياباعىندا «Tulipmania 2021» اتتى تاقىرىپتىق كورمە وتۋدە. بۇل تۋرالى almaty-akshamy.kz ق ر سىرتقى ىستەر مينيسترلىگىنىڭ Telegram كانالىنا سىلتەمە جاساپ حابارلايدى.
سالتاناتتى شاراعا سينگاپۋردىڭ پارلامەنتى، اكادەميالىق جانە ىسكەرلىك ورتانىڭ، ديپكورپۋستىڭ، قازاق دياسپوراسىنىڭ وكىلدەرى مەن جەرگىلىكتى ازاماتتار قاتىستى. ءىس-شارانىڭ قۇرمەتتى قوناعى سينگاپۋردىڭ پرەمەر-مينيستر كەڭسەسىندەگى مينيستر، ەكىنشى قارجى ءمينيسترى جانە ەكىنشى ۇلتتىق دامۋدىڭ ءمينيسترى يندراني رادجا بولدى.
«Gardens by the Bay» ساياباعىندا وتكىزىلەتىن جىل سايىنعى كورمە - سينگاپۋردىڭ مادەني كۇنتىزبەسىندەگى ماڭىزدى وقيعا. ەلىمىزدىڭ مادەني مۇراسى مەن تابيعي كورىكتى جەرلەرىنە ارنالعان بيىلعى كورمەنىڭ تاقىرىبى – «تيۋلپانومانيا» كەزدەيسوق تاڭدالمادى: قىزعالداقتاردىڭ وتانى – قازاق دالاسى ەكەنىن بىلەتىندەر از. ول جەردەن ەجەلگى ۋاقىتتا بۇل ەرەكشە گۇل ەۋروپاعا اكەلىنىپ، كەڭ تانىمالدىققا يە بولدى. ساياباقتىڭ اتقارۋشى ديرەكتورى فەليكس لوۋ پاندەميا كەزىندەگى قازىرگى كارانتين شەكتەۋلەرىنە قاراماستان، باعالاۋلار بويىنشا كورمەگە 100-دەن 200 مىڭعا دەيىن سينگاپۋرلىق جانە وزگە دە شەتەلدىك تۋريستەر كەلەتىنىنە سەنىم ءبىلدىردى.
وسىنداي اۋقىمداعى ءىس-شارا ەكىجاقتى ىنتىماقتاستىق تاريحىندا العاش رەت سينگاپۋردا وتكىزىلىپ وتىر.
مەرەيتويلىق وقيعانىڭ قۇرمەتىنە ارالدىڭ ورتالىق اۋدانىندا ورنالاسقان 101 گا الاڭداعى «Gardens by the Bay» ساياباعىندا ۇلى جىبەك جولىنىڭ ءداستۇرلى بازارلارى قايتا جاڭعىرتىلدى، قوجا احمەت ياساۋي كەسەنەسىنىڭ ماكەتى سالىندى، ءداستۇرلى قازاق كيىز ءۇيى ورناتىلدى. حالىقارالىق كورمەدە ۇسىنىلعان ءتۇرلى ەتنوگرافيالىق ماتەريالدار، قازاق تۇرمىسىنىڭ زاتتارى سول زاماننىڭ رۋحىن كوتەرۋگە كومەكتەسەدى.
اشىلۋ سالتاناتىندا ءسوز سويلەگەن قازاقستاننىڭ سينگاپۋرداعى ەلشىسى اركەن ارىستانوۆ كورمەنىڭ ەكى ەل اراسىنداعى ءوزارا قارىم-قاتىناس جىلناماسىندا ءوز ءىزىن قالدىراتىنىنا جانە مادەني-گۋمانيتارلىق ىنتىماقتاستىقتى ىلگەرىلەتۋگە ىقپال ەتەتىنىنە، سونداي-اق جىبەك جولىنىڭ ماڭىزدى بۋىنى رەتىندە قازاقستاننىڭ تۋريستىك تانىمالدىلىعىن، باي مادەني، رۋحاني جانە تابيعي مۇراسى بار ەل رەتىندە ىلگەرىلەتۋگە ماڭىزدى ۇلەس قوساتىنىنا سەنىم ءبىلدىردى.
كورمەنى ۇيىمداستىرۋعا سينگاپۋردا تۇراتىن قازاقستاندىق دياسپورا وكىلدەرى ەلەۋلى ۇلەس قوستى. ىشكى جابدىعى بار قازاق كيىز ءۇيىن وسى كورمە ءۇشىن «شەبەرلەر اۋىلى» وتاندىق كومپانياسىنىڭ ماماندارى ارنايى جاساپ، ۇشاقپەن جەتكىزدى.
قازاقستاندىق مۋزىكانتتاردىڭ ورىنداۋىنداعى ۇلتتىق اۋەندەر كونسەرتى اشىلۋ سالتاناتىنا قاتىسقان قوناقتاردىڭ جوعارى باعاسىنا يە بولدى.
كورمە 14 قاراشاعا دەيىن جالعاسادى.