تۇركيا پرەزيدەنتى رەجەپ تاييپ ەردوعان Instagram-پاراقشاسىندا قازاقستان پرەزيدەنتى قاسىم-جومارت توقايەۆتىڭ ساپارىنا قاتىستى بىرنەشە جازبا جاريالادى، - دەپ حابارلايدى اqshamnews.kz ءتىلشىسى.
تۇركيا كوشباسشىسى ەكىجاقتى قاتىناستاردىڭ ستراتەگيالىق سيپاتىن اتاپ ءوتىپ، ەلدەر اراسىنداعى باۋىرلاستىق بايلانىستاردى نىعايتۋعا توقايەۆتىڭ قوسقان ۇلەسىن جوعارى باعالادى.
ەردوعان توقايەۆتىڭ قىزمەتكە كىرىسكەن ساتىنەن باستاپ قازاقستاننىڭ ىنتىماقتاستىقتى دامىتۋعا دەگەن تۇراقتى ۇستانىمىن كورسەتىپ كەلە جاتقانىن مالىمدەدى. دوستىق پەن سەرىكتەستىكتى نىعايتۋداعى قىزمەتى ءۇشىن توقايەۆ ەڭ جوعارى تۇرىك وردەنى – تۇركيانىڭ مەملەكەتتىك وردەنىمەن ماراپاتتالدى.
"قازاقستان پرەزيدەنتى، مەنىڭ قىمباتتى باۋىرىم توقايەۆ، العاشقى كۇننەن-اق تۇركيانىڭ جاقىن دوسى ەكەنىن ناقتى قادامدارىمەن دالەلدەپ كەلەدى"، — دەپ جازدى ەردوعان.
ەردوعاننىڭ ايتۋىنشا، انكارادا وتكەن كەزدەسۋدە تاراپتار قورعانىس، ەنەرگەتيكا، لوگيستيكا، عىلىم جانە تەرروريزمگە قارسى كۇرەس ماسەلەلەرىن تالقىلاپ، ەكىجاقتى 20 قۇجاتقا قول قويعان.
تۇركيا پرەزيدەنتى قازاقستاننىڭ تۇركيا ازاماتتارى ءۇشىن ۆيزاسىز بولۋ مەرزىمىن 90 كۇنگە ۇزارتۋ شەشىمىن ەرەكشە اتاپ ءوتىپ، توقايەۆقا العىسىن ءبىلدىردى.
ەسكە سالايىق، قازاقستان پرەزيدەنتى 28 شىلدەدە رەسمي ساپارمەن انكاراعا باردى. توقايەۆتى تۇركيا پرەزيدەنتىنىڭ ءوزى قارسى الدى.
ايتا كەتەيىك، ەردوعان شەتەلدىك كوشباسشىلاردى اۋەجايدا سيرەك قارسى الادى — ادەتتە بۇل مىندەتتى رەسمي وكىلدەر اتقارادى. مۇنداي ەرەكشەلىك تەك ەرەكشە دوستاس مەملەكەتتەر باسشىلارىنىڭ ساپارىندا عانا جاسالادى.