الماتى قالاسىنىڭ اكىمى دارحان ساتىبالدى جۇمىس ساپارىمەن تۇركسىب اۋدانىنا بارىپ، «جاس قانات» شاعىناۋدانىنىڭ تۇرعىندارىمەن كەزدەستى. جەرگىلىكتى حالىق اباتتاندىرۋ جۇمىستارى ءۇشىن قالا باسشىسىنا ريزاشىلىق ءبىلدىردى.
تۇرعىنداردىڭ ءوتىنىشى بويىنشا تۇرعىن ءۇي كەشەنىنىڭ اۋماعىندا زاماناۋي بالالار ويىن الاڭى مەن ءتۇرلى ويىن جانە سپورتتىق جابدىقتار ورناتىلعان. سونداي-اق، كەڭ فۋتبول الاڭى سالىندى. بۇعان قوسا، جوبا اياسىندا جاستار مەن ەرەسەكتەرگە ارنالعان دەمالىس ايماعى جاساقتالىپ، جاياۋ جۇرگىنشىلەر جولدارى توسەلىپ، ورىندىقتار مەن دەمالىس ورىندارى قويىلدى.
«وتكەن جولى وزدەرىڭىز مۇندا «وينايتىن، دەمالاتىن ورىن جوق» دەپ ايتقان ەدىڭىزدەر. بالالار دا كەلىپ، ويىن الاڭىن سۇراعان ەدى. ايتا كەتەيىن، بۇل قۇرىلىسقا بيۋدجەت قارجىسى جۇمسالعان جوق. جوبا كاسىپكەرلەردىڭ قولداۋىمەن جۇزەگە استى»، — دەدى قالا اكىمى.
ءوز كەزەگىندە «جاس قانات» تۇك تۇرعىندارى اتقارىلعان جۇمىسقا ريزاشىلىق ءبىلدىردى: «بالالار الاڭىن سالۋ كەزىندە بارلىق ۇسىنىسىمىز بەن ەسكەرتۋىمىز ەسكەرىلدى. ەندى بالالارىمىز اسىر سالىپ ويناپ، فۋتبولمەن اينالىسىپ ءجۇر. بىزگە ءبارى ۇنايدى!» — دەدى ولار.
ساپار بارىسىندا قالا اكىمى تۇرعىن ءۇي كەشەنىندەگى وزگە دە اۋلالاردى ارالاپ كوردى. تۇرعىندار گاز تارتۋ، جارىقتىڭ ءۇزىلىسسىز بەرىلۋى، كىرەبەرىستەر مەن شاتىرلاردىڭ جاعدايى، سونداي-اق، پيك قىزمەتىنە قاتىستى ماسەلەلەردى كوتەردى. بۇل تۇيتكىلدەردى شەشۋ ءۇشىن الماتى اكىمى ناقتى تاپسىرمالار بەردى: «قۇرىلىس باسقارماسىنا كوممۋنالدىق ينفراقۇرىلىمدى دامىتۋ باسقارماسىمەن جانە اۋدان اكىمدىگىمەن بىرلەسىپ تۇرعىندارمەن، پيك توراعاسىمەن جانە «الماتىەنەرگوسبىت» وكىلدەرىمەن ورتاق جينالىس وتكىزىپ، ەلەكترمەن جابدىقتاۋ، جەدەل ساتىلاردى كۇتىپ ۇستاۋ مەن باسقا دا كوممۋنالدىق تۇيتكىلدەردى شەشۋدى تاپسىرامىن»، — دەدى دارحان ساتىبالدى.
سونىمەن قاتار اكىمنىڭ تاپسىرماسىمەن تۇرعىن ءۇي كەشەنىنىڭ ىشكى اۋلالارىنا اسفالت توسەلىپ، جول بەلگىلەرى ورناتىلادى. بارلىق جۇمىس تۇرعىنداردىڭ پىكىرى ەسكەرىلە وتىرىپ جۇرگىزىلەدى.
بۇعان قوسا، دارحان ساتىبالدى «جاس قانات» پەن «ماياك» شاعىناۋداندارىنىڭ اۋماعىنداعى 100 گەكتاردان اساتىن «جەلتوقسان» پاركىنىڭ اباتتاندىرىلۋ بارىسىمەن دە تانىستى. دەمالىس ايماعىنا اۋەجاي كولىنىڭ جاعالاۋى كىرەدى، جاسىل جەلەك اۋماعى شامامەن 23 مىڭ شارشى مەتر. ساياباق ايماعىن كۇتىپ-ۇستاۋ جانە اباتتاندىرۋ ەلەمەنتتەرىن قالپىنا كەلتىرۋ بويىنشا مەردىگەر ۇيىم انىقتالعان.
بۇگىندە ساياباق اۋماعىندا سۋارۋ جۇيەسىن ورناتۋ جۇمىستارى جالعاسىپ جاتىر. بۇعان دەيىن سىرتقى جارىقتاندىرۋ جەلىلەرى مەن باسقارۋ شكافتارى ورناتىلعان بولاتىن. قالا اكىمى ساياباقتاعى جارىق جۇيەسىنىڭ ۇزدىكسىز جۇمىس ىستەۋىن قامتاماسىز ەتىپ، سۋارۋ جۇيەسىن بەلگىلەنگەن مەرزىمدە تولىق اياقتاۋدى تاپسىردى.