بايقاۋعا 70-تەن استام وقۋشى قاتىستى
قازاقستان رەسپۋبليكاسى پرەزيدەنتىنىڭ ءارحيۆى حالىقارالىق ارحيۆتەر كەڭەسىنىڭ دەمەۋىمەن 2022 جىلعى 19-21 قازاندا الماتى قالاسىندا «اشىق قوعامعا – اشىق ارحيۆ» I حالىقارالىق ارحيۆيستەر كونگرەسىن وتكىزەدى. كونگرەس اياسىندا قازاقستان رەسپۋبليكاسى پرەزيدەنتىنىڭ ءارحيۆى «مەنىڭ وتباسىمنىڭ تاريحى ارحيۆ قۇجاتتارىندا» مەكتەپتىك وقۋ-زەرتتەۋ جۇمىستارىنىڭ كونكۋرسى وتەدى، دەپ حابارلايدى Almaty-akshamy.kz.
كونكۋرستىڭ ماقساتى – جالپى ءبىلىم بەرەتىن مەكەمەلەر وقۋشىلارىنىڭ زياتكەرلىك جانە تۇلعالىق دامۋى، ولاردىڭ تاريحتى زەردەلەۋ سالاسىنداعى عىلىمي-زەرتتەۋ جۇمىستارىنىڭ ادىستەرى مەن تاسىلدەرىن مەڭگەرۋى، جاستاردى قازاقستاننىڭ تاريحي-مادەني مۇراسىن، وتاندىق تاريح، تۋعان جەر، وتباسى تاريحى بويىنشا قۇجاتتىق دەرەكتەردى زەرتتەۋ مەن ساقتاۋعا تارتۋ بولىپ تابىلادى.
بايقاۋعا 70-تەن استام وقۋشى قاتىستى. زەرتتەۋ جۇمىستارىن ارنايى كوميسسيا باعالادى. جۇمىستى باعالاۋ كەزىندە قۇرىلىمى، تاريحنامالىق شولۋدىڭ بولۋى، پايدالانىلعان دەرەكتەر بازاسىنىڭ سيپاتتاماسى، زەرتتەۋ ماقساتىنا قول جەتكىزۋدى كورسەتەتىن ماقسات، مىندەتتەردى، قورىتىندىلاردى تۇجىرىمداۋ، ناقتى زەرتتەۋ ادىستەرىنىڭ سيپاتتاماسى جانە ولاردى قولدانۋدىڭ شىعارماشىلىق زەرتحاناسى، جۇمىس ماتىنىنە سىلتەمەلەردىڭ بيبليوگرافيالىق رەسىمدەلۋى، دەرەككوزدەر مەن ادەبيەتتەر ءتىزىمى ەسكەرىلەدى. شىعارماداعى اۆتورلىق ءماتىننىڭ ۇلەسى 70% كەم بولماۋى كەرەك. بايقاۋ جەڭىمپازدارىن ماراپاتتاۋ ءراسىمى 19 قازان رەسپۋبليكالىق دوستىق ۇيىندە كونگرەستىڭ رەسمي اشىلۋ كۇنى وتكىزىلەدى.
كونكۋرسقا جالپى ءبىلىم بەرۋ مەكەمەلەرىنەن نيەت بىلدىرگەن 8-11 سىنىپ وقۋشىلارى جانە 6-7 سىنىپ وقۋشىلارا ۇجىمدىق جۇمىستى ۇسىنۋ ارقىلى قاتىستى.