اقش، ەو، ازيا جانە تمد-نىڭ 15-كە جۋىق ەلدەرىنەن جەتەكشى عالىمدار مەن ارحيۆ ءىسىنىڭ ساراپشى ماماندارى قاتىسادى
قازاقستان رەسپۋبليكاسى پرەزيدەنتىنىڭ ءارحيۆى حالىقارالىق ارحيۆتەر كەڭەسىنىڭ دەمەۋىمەن 2022 جىلعى 19-21 قازاندا الماتى قالاسىندا «اشىق قوعامعا – اشىق ارحيۆ» I حالىقارالىق ارحيۆيستەر كونگرەسىن وتكىزەدى، دەپ حابارلايدى Almaty-akshamy.kz.
قازاقستان الەمنىڭ 200 ەلىنىڭ ارحيۆشىلەرىن بىرىكتىرەتىن يۋنەسكو ۇيىمىنىڭ قۇرىلىمى – حالىقارالىق ارحيۆتەر كەڭەسى باسشىلىعىنىڭ قولداۋىمەن جانە قاتىسۋىمەن كاسىبي ارحيۆ قوعامداستىعى ءىس-شاراسىن وتكىزەتىن تمد ەلدەرىندەگى العاشقى مەملەكەت بولدى.
ءىس-شارانىڭ ماقساتى – تاريحتى ساقتاۋشىلاردىڭ كاسىبي قوعامداستىعىنىڭ ءوزارا ءىس-قيمىلى مەن سىندارلى ديالوگى ءۇشىن تۇراقتى جۇمىس ىستەيتىن حالىقارالىق كەلىسسوز الاڭىن قۇرۋ، تاريحي-مادەني جانە دەرەكتى مۇرانى ساقتاۋدىڭ وزەكتى ماسەلەلەرى بويىنشا ۇسىنىستاردى، شەشىمدەردى تالقىلاۋ جانە قابىلداۋ، ءارحيۆتى دامىتۋدىڭ يننوۆاسيالىق يدەيالارىن قالىپتاستىرۋ، جوبالاردى ىسكە اسىرۋ جانە ۇزدىك ارحيۆتىك تاجىريبەلەردى تيراجداۋ.
كونگرەسس اياسىندا مادەنيەت، ونەر، ادەبيەت، عىلىم جانە ءبىلىم ارقىلى قوعام ءۇشىن ارحيۆتىك قۇجاتتاردىڭ ءرولى مەن ماڭىزىن اشاتىن تاقىرىپتىق الاڭدار (ارحيۆتىك پىكىرتالاس كۋرستار) ۇيىمداستىرىلاتىن بولادى. ارحيۆتىك لەكتورييلەر فورماتىندا شاقىرىلعان نەگىزگى سپيكەرلەردىڭ ءسوز سويلەۋىمەن كاسىبي سەسسيالار جوسپارلانعان جانە ولاردىڭ قورىتىندىسى بويىنشا اشىق تالقىلاۋلار وتەدى.
كونگرەسكە سپيكەرلەر رەتىندە وتاندىق ارحيۆشىلەر مەن زيالى قاۋىم وكىلدەرىمەن قاتار اقش، ەو، ازيا جانە تمد-نىڭ 15-كە جۋىق ەلدەرىنەن جەتەكشى عالىمدار مەن ارحيۆ ءىسىنىڭ ساراپشى ماماندارى قاتىسادى.
جۇمىس تىلدەرى: قازاق، ورىس، اعىلشىن، تۇرىك، جۇڭگو.
2022 جىلدىڭ 19 قازانى ساعات 10.00-دە (استانا ق. ۋاقىتىمەن، GMT +6) حالىقارالىق ارحيۆشىلەردىڭ كونگرەسىنىڭ رەسمي اشىلۋ ءراسىمى وتەدى. اشىلۋ سالتاناتىنا ق ر پرەزيدەنتى اكىمشىلىگى مەن ق ر مادەنيەت جانە سپورت مينيسترلىگىنىڭ وكىلدەرى، الماتى قالاسىنىڭ اكىمدىگى، شەتەلدىك جانە وتاندىق ارحيۆ مەكەمەلەرىنىڭ باسشىلارى، ديپلوماتيالىق كورپۋس وكىلدەرى، مەملەكەت جانە قوعام قايراتكەرلەرى قاتىسادى دەپ كۇتىلۋدە.