بايقوڭىر بۇگىنگى تاڭدا جۇمىس ىتەپ تۇرعان الەمدەگى ەڭ ءىرى عارىش ايلاعى
قازاقستان رەسپۋبليكاسى پرەزيدەنتىنىڭ ءارحيۆى حالىقارالىق ارحيۆتەر كەڭەسىنىڭ دەمەۋىمەن 2022 جىلعى 19-21 قازاندا الماتى قالاسىندا «اشىق قوعامعا – اشىق ارحيۆ» I حالىقارالىق ارحيۆيستەر كونگرەسىن وتكىزەدى، دەپ حابارلايدى Almaty-akshamy.kz.
كونگرەسكە سپيكەرلەر رەتىندە وتاندىق ارحيۆشىلەر مەن زيالى قاۋىم وكىلدەرىمەن قاتار اقش، ەو، ازيا جانە تمد-نىڭ 15 ەلىنەن جەتەكشى عالىمدار مەن ارحيۆ ءىسىنىڭ ساراپشى ماماندارى قاتىسادى.
كونگرەسس اياسىندا ق ر پرەزيدەنتىنىڭ ءارحيۆى 18 قازاندا الماتى قالاسى مەتروپوليتەنىنىڭ بايقوڭىر ستانسياسىندا «بايقوڭىر عارىش ايلىعى» تاقىرىبىندا كورمە ۇسىنادى.
بايقوڭىر بۇگىنگى تاڭدا جۇمىس ىتەپ تۇرعان الەمدەگى ەڭ ءىرى عارىش ايلاعى. ول قىزىلوردا وبلىسى قازالى قالاسى مەن جوسالى كەنتى اراسىندا، تورەتام كەنتى ماڭىندا ورنالاسقان. زىمىران قۇرىلىسىنىڭ باس قۇراستىرۋشىسى س.پ. كوروليەۆتىڭ تۇجىرىمى بويىنشا عارىش ايلاعى ەكۆاتورعا جاقىن بولعان سايىن، زىمىراندى عارىشقا ۇشىرۋ ءۇشىن جەردىڭ اينالۋ جىلدامدىعىن قولدانۋ دا ىڭعايلى بولادى. 1955 جىلدىڭ 12 اقپان كۇنى زىمىران ۇشىرۋعا ارنالعان سىناق الاڭىن اشۋ تۋرالى كوكپ وك مەن كسرو مينيسترلەر كەڭەسىنىڭ بىرلەسكەن قاۋلىسىنىڭ ناتيجەسىندە قۇرىلعان. بولاشاق عارىش ايلاعىنىڭ قۇرىلىسى 1955 جىلى باستالدى. 1957 جىلى جەردىڭ العاشقى جاساندى جەر سەرىگى ۇشىرىلدى. ال 1961 جىلدىڭ 12 ءساۋىر كۇنى بايقوڭىر عارىش ايلاعىنان العاش رەت ادام باسقاراتىن عارىش كەمەسى ۇشىرىلدى. «ۆوستوك-1» كەمەسىنىڭ بورتىندا عارىشكەر يۋريي الەكسەيەۆيچ گاگارين بولدى.
كورمەدە بايقوڭىر تاريحىن بەينەلەيتىن فوتوسۋرەتتەر مەن قۇجاتتار ۇسىنىلادى. ولاردىڭ قاتارىندا عارىشكەرلەر يۋ. گاگارين، ۆ. سيەۆاستيانوۆ، ت. مۇسابايەۆ، يۋ. مالەنچەنكو، ۋ. مەربولدتىڭ جانە بايقوڭىر عارىش ايلاعىنىڭ اسكەري قىزمەتشىلەرىنىڭ ۇشۋ الدىنداعى سۋرەتتەرى بار.
سونىمەن قاتار اباي ستانسياسىندا الماتى قالاسىنىڭ مەملەكەتتىك ورتالىق ءارحيۆى «قالا پەيزاجىنىڭ وزگەرۋى» تاقىرىبىندا، ب. مومىش ۇلى ستانسياسىندا ق ر ورتالىق مەملەكەتتىك ءارحيۆى «باۋىرجان مومىش ۇلى – كەڭەس وداعىنىڭ باتىرى، داڭقتى پانفيلوۆشى، جازۋشى» تاقىرىبىندا كورمە ۇيىمداستىرادى.