الماتىدا «مەنىڭ باپكەرىم» اتتى سەريالدىڭ ءتۇسىرىلىمى اياقتالدى. جاڭا تۋىندىدا «قايرات» فۋتبول ۇجىمى ەكس-مۇشەسىنىڭ باستان وتكەرگەن قيىندىقتارى كورسەتىلەدى. تەلەحيكايانىڭ باس رەجيسسەرى – سايات سارۋار.
– سەناريي بويىنشا، ءبىزدىڭ باستى ءرولدى سومدايتىن جىگىت – «قايرات» فۋتبول كومانداسىنىڭ ەكس-مۇشەسى. ول العان جاراقاتىنان كەيىن اراعا 10 جىل سالىپ، جاتتىقتىرۋشى رەتىندە قايتا ورالادى. ونىڭ ومىرىندە ۇزاق ۋاقىتتىق ۇزىلىستەن كەيىن جاڭا ءومىر باستالادى. باستى رولدە وينايتىن جىگىتتىڭ ەسىمى ەرنازار، – دەدى رەجيسسەر.
سپورت سالاسىن دارىپتەيتىن بۇل تۋىندى 12 سەريادان تۇرادى. ءار ءبولىمنىڭ جاستارعا بەرەر وزىندىك ءمان-ماعىناسى بار.
– بۇل سەريال جاستارعا ارنالعان. مەن فيزيكالىق تۇرعىدا كينوعا تۇسۋگە ءارقاشان دايىنمىن. «مەنىڭ باپكەرىم» سەريالىندا ءازىلقوي جىگىتتىڭ ءرولىن سومدايمىن. نەگىزىندە، ءبىز باستى رولدە وينايتىن جىگىتتىڭ قاسىندا ەكىنشى پلاندا جۇرەمىز. سەناريي بويىنشا، ۇيىمشىل كوماندامىز. باپكەرىمىز وتە قاتال، جەڭىلىپ قالماۋ ءۇشىن قولدان كەلگەننىڭ ءبارىن ىستەيدى، – دەدى اكتەر ءاليحان ادىلبەكوۆ.
ايتا كەتەيىك، تەلەحيكايادا بەيبارىس بادەن، باقىتجان اقپاروۆ، ايبار سالى، اقبوتا نۇر، دارىن شىنىبەك، مەدەت دىنمۇحامەد، جاسۇلان كوپبەرگەن رولدەردە وينايدى.