13 قاراشا - حالىقارالىق زاعيپتار كۇنى.
الماتىدا زاعيپ جاندار اراسىندا قالالىق ءان بايقاۋى ءوتتى، دەپ حابارلايدى aqshamnews.kz
قوعامدا كوز جانارىنان ايىرىلسا دا، مۇمكىندىگى شەكسىز تالاي جان بار. بۇگىن سونداي ازاماتتاردىڭ قاتىسۋىمەن “مەگا” ويىن-ساۋىق ورتالىعىندا ءان بايقاۋى ۇيىمداستىرىلدى. 
ءىس-شارانى الماتى قالالىق «قازاقستان زاعيپتار قوعامى» قوعامدىق بىرلەستىگى الماتى قالاسىنىڭ جۇمىسپەن قامتۋ جانە الەۋمەتتىك باعدارلامالار باسقارماسىنىڭ قولداۋىمەن وتكىزىپ وتىر.
شىعارماشىلىق سايىسقا قالاداعى كورۋ قابىلەتى بۇزىلعان جانە ناشار كورەتىن جاندار قاتىسىپ، ولاردىڭ ونەرىن كاسىبي قازىلار القاسى باعالادى. بايقاۋ تالابى بويىنشا ءار قاتىسۋشى 2 اننەن، ونىڭ ءبىرى قازاقشا ءان ورىندادى. 16 قاتىسۋشىنىڭ اندەرى دە وتان، تۋعان جەر، الماتى تاقىرىپتارىندا بولدى. ارنايى مۋزىكالىق ءبىلىمى بولماسا دا، شەبەرلىكپەن شىرقاپ شىقتى.
الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى باۋىرجان جاۋباسوۆ "الماتى - تەڭ مۇمكىندىكتەر قالاسى"قاعيداسىن جۇزەگە اسىرىپ، قالامىزدا ينكليۋزيۆتى ورتانى قالىپتاستىرۋدا وسىنداي شارالاردىڭ ماڭىزى زور ەكەنىن اتاپ ءوتتى.
بايقاۋ قاتىسۋشىلارىنىڭ ءبىرى - مەرەكە جۇمابەكوۆانىڭ كوزى تۋعانىنان كورمەيدى. بۇگىندە ول قازاق سپورت جانە تۋريزم اكادەمياسىنىڭ 4-كۋرس ستۋدەنتى. مۇنداي بايقاۋعا العاش رەت قاتىسىپ وتىر.
“قالاداعى زاعيپتار قوعامى وسىنداي شارالاردى ءجيى ۇيىمداستىراتىنىن ەستيتىنمىن. وسى جولى ماعان دا قاتىسۋعا ۇسىنىس جاسادى. ءان ايتقاندى جاقسى كورەمىن. سول ءۇشىن دە قۋانا قابىل الدىم. بايقاۋدا روزا رىمبايەۆانىڭ “كۋا بول” جانە جازيرا بايىربەكوۆانىڭ ورىنداۋىنداعى “ارمانسىز كۇنىم بولمايدى” اندەرىن ورىندادىم”، - دەيدى مەرەكە.
الماتى قالالىق «قازاقستان زاعيپتار قوعامى» قوعامدىق بىرلەستىگىنىڭ ءتوراعاسى التىناي قوڭىراتباي قىزى: “ءىس-شارانىڭ ءمانى - تەك شىعارماشىلىق جارىس ەمەس، ينكليۋزيانى قولداۋ، كورۋ قابىلەتىنەن ايىرىلعان جانداردىڭ قوعامداعى ءرولىن كۇشەيتۋ” دەدى.
“وسىنداي بايقاۋلار زاعيپ جانداردىڭ قوعامعا ەنۋىنە، ونەرىن شىنداۋىنا، دامىتۋىنا ۇلكەن ۇلەس قوساتىنىنا سەنەمىز. قالالىق جۇمىسپەن قامتۋ جانە الەۋمەتتىك باعدارلامالار باسقارماسىنان ۇلكەن قولداۋ بولىپ، ءىس-شارانى ۇيىمداستىرىپ وتىرمىز. مۇمكىندىگى شەكتەۋلى جانداردىڭ مۇمكىندىگىن شەكسىز ەتىپ، باسقالار سياقتى وزدەرىنىڭ قۇقىعى تەڭ بولۋى ءۇشىن جاسالىپ جاتقان امال. بۇل دا ينكليۋزيالىق ورتا قۇرۋعا ءبىر قادام دەپ ايتۋعا بولادى. الماتى قالالىق «قازاقستان زاعيپتار قوعامى» قوعامدىق بىرلەستىگىنىڭ مىڭنان استام مۇشەسى بار. سول جانداردىڭ باسىن قوسىپ، الەۋمەتتىك جاعدايىنا كومەكتەسىپ تۇرامىز. ءتورت قابىرعانىڭ ىشىندە وتىرىپ قالماي، قوعاممەن ارالاسۋىنا جاعداي جاسايمىز”،- دەيدى ول.