ەرەكشە ءبىر جىلۋلىققا تولى، جۇرەكتەرگە كۇش-قۋات سىيلاعان مادەني شارا ءوتتى. «قازاق سوقىرلار قوعامى» قوعامدىق بىرلەستىگىنىڭ الماتى قالالىق فيليالى جانە الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسىنىڭ ۇيىمداستىرۋىمەن وتكەن «مەن سەنى سۇيەم، ءومىر!» اتتى قالالىق ءان بايقاۋى - مۇمكىندىگى شەكتەۋلى جاندارعا ارنالعان مەرەكەلىك كونسەرت قانا ەمەس، ومىرگە دەگەن قۇشتارلىقتىڭ، رۋحاني كۇشتىڭ، ادام جانىنداعى شەكسىز مۇمكىندىكتىڭ ايقىن كورىنىسى بولدى.
بيىلعى بايقاۋ «حالىقارالىق مۇگەدەكتەر كۇنى» مەن «حالىقارالىق كوز مۇگەدەكتەرى كۇنىنە» وراي ۇيىمداستىرىلدى. ماقسات - زاعيپ جانە ناشار كورەتىن جاندارعا ءوز ونەرىن كورسەتۋگە مۇمكىندىك بەرۋ، قوعام نازارىن ولار جاساي الاتىن ىستەرگە بۇرۋ، سونداي-اق ينكليۋزيۆتى مادەنيەتتى دامىتۋ. ونەر – ولار ءۇشىن تەك حوببي ەمەس، ءومىردىڭ ءوزى. شارا باستالماي جاتىپ-اق زال ىشىندە ەرەكشە تولقۋ سەزىلدى. جينالعان قوناقتار مەن قالا تۇرعىندارى ساحناعا شىعادى دەپ كۇتىلگەن ونەرپازداردىڭ قۋانىشىن بولىسۋگە اسىققانداي. ال ساحنا سىرتىندا ءوز كەزەگىن كۇتىپ تۇرعان قاتىسۋشىلاردىڭ جۇزىندە قوبالجۋ دا، سەنىم دە، دايىندىقتىڭ نىق ءىزى دە بايقالدى.
كوپشىلىگى مۋزىكاعا بالا كۇنىنەن اۋەستەنگەن. ءبىرى - گيتارامەن ءان ورىندادى، ءبىرى - ەسترادالىق باعىتتا، ەندى ءبىرى - كلاسسيكالىق شىعارمالاردى شەبەرلىكپەن جەتكىزدى. بۇل جانداردىڭ ونەرىن تاماشالاپ، قولداۋ كورسەتۋگە تانىمال ونەر يەلەرى دە كەلدى. ايجان نۇرماعامبەتوۆا مەن بەك ورالبەكوۆ قازىلار القاسى رەتىندە ءادىل باعاسىن بەرىپ، جەڭىمپازدارعا سىيلىقتاردى تابىستادى. ۇيىمداستىرۋشىلاردىڭ ايتۋىنشا، مۇنداي شارالار قاتىسۋشىلارعا عانا ەمەس، قوعامنىڭ وزىنە دە اۋاداي قاجەت.
«ءبىزدىڭ ماقسات - زاعيپ جانداردى اياۋ ەمەس، ولاردىڭ مۇمكىندىگىن كورسەتۋ. ولار بىزدەن الدەقايدا جىگەرلى، قايسار. سوندىقتان مۇنداي ءىس-شارالاردى تۇراقتى تۇردە وتكىزۋدى قولعا الىپ كەلەمىز. كەلەسى جىلى وسى بايقاۋدى فيليالدار اراسىندا كەڭەيتىپ، رەسپۋبليكالىق دەڭگەيگە شىعارۋدى جوسپارلاپ وتىرمىز. الدىڭعى جىلى دا ءدال وسى شارا وتكەن بولاتىن. سول كەزدە باس جۇلدە العان قاتىسۋشىلاردى بيىل قايتا قوسپاۋدى ءجون كوردىك. بۇگىن 13 قاتىسۋشى ونەر كورسەتەدى. جەڭىمپازدارعا اقشالاي سىيلىقتار تابىستالادى. باس جۇلدە - 200 000 تەڭگە، ءبىرىنشى ورىن - 150 000 تەڭگە، ەكىنشى ورىن — ءارقايسىسىنا 100 000 تەڭگەدەن ەكى جەڭىمپازعا، ال ءۇشىنشى ورىن - ءۇش قاتىسۋشىعا 50 000 تەڭگەدەن بەرىلەدى»، - دەيدى «قازاق زاعيپتار قوعامى» قوعامدىق بىرلەستىگىنىڭ فيليال باسشىسى التىناي قوڭىراتباي قىزى.
بايقاۋ بارىسىندا ءاربىر قاتىسۋشى ءوز قۇلشىنىسى مەن جان دۇنيەسىن جۇرەك تەربەيتىن اندەر ارقىلى كورسەتتى. ءبىرى - اتا-اناسىنا العىس ارنادى، ءبىرى - تۋعان جەردى جىرلادى، ەندى ءبىرى – ءومىردى ءوز كوزدەرىمەن كورۋدى اڭسايتىندارىن وزدەرىنىڭ اۆتورلىق اندەرىمەن جەتكىزدى. بايقاۋدىڭ اتاۋى كەزدەيسوق قويىلماعان. «مەن سەنى سۇيەم، ءومىر!» - بۇل زاعيپ جانداردىڭ ومىرگە دەگەن ۇستانىمى ىسپەتتى.