تۋريزم - قازاقستانداعى قارقىندى دامىپ كەلە جاتقان سالالاردىڭ ءبىرى. ينفراقۇرىلىمنىڭ جاقسارۋى، سيفرلاندىرۋ جانە اۋە قاتىناستارىنىڭ كەڭەيۋى الماتىنى دا حالىقارالىق جانە ىشكى ساياحاتشىلار ءۇشىن بارىنشا قولجەتىمدى ءارى تارتىمدى ەتە ءتۇستى. 2025 جىلى قالانىڭ تۋريزم كورسەتكىشتەرى تۇراقتى ءوسىم كورسەتتى. تۋريستەردى قولجەتىمدى باعا، باي مادەني مۇرا، ەرەكشە تابيعي لاندشافتتار قىزىقتىرادى. الماتىعا اسىرەسە كورەيا، جۇڭگو، تمد ەلدەرىنەن كەلەتىندەر كوپ. قالانىڭ اسەم تابيعاتى ونىڭ تۋريستىك برەندىن كۇشەيتىپ وتىر.
Aqshamnews.kz ساۋالىنا جاۋاپ رەتىندە الماتى قالاسى تۋريزم باسقارماسى 2025 جىلدىڭ باسىنان 1 جەلتوقسانعا دەيىنگى رەسمي دەرەكتەردى ۇسىندى.
2025 جىلعى تۋريستەر لەگى: ءوسىم جانە نەگىزگى كورسەتكىشتەر
2025 جىلدىڭ ءبىرىنشى جارتى جىلدىعىندا الماتىعا 1 ملن 140 مىڭ تۋريست كەلگەن - بۇل بىلتىرمەن سالىستىرعاندا 6،5% ءوسىم.
- شەتەلدىك تۋريستەر سانى 7%-عا ارتىپ، 323،6 مىڭ ادامعا جەتتى.
- ىشكى تۋريزم دە قارقىن الدى: 816 مىڭ تۋريست، ءوسىم - 6،3%.
الماتى ءتۋريزمىنىڭ جاندانۋىنا تانىمال جۇلدىزدار قاتىسقان ءىس-شارالار دا سەپتىگىن تيگىزىپ، وڭ اسەر ەتپەي قويمادى.
ديماش قۇدايبەرگەننىڭ فان-كەزدەسۋى: 45 ەلدەن 10 مىڭ قوناق
بيىل 26 مامىردا ءانشىنىڭ الماتىدا وتكەن فان-كەزدەسۋىنە الەمنىڭ 45 ەلىنەن كەلگەن جانكۇيەرلەر شامامەن 10 مىڭعا جۋىق قوسىمشا ءقوناقۇي مەن تۇراتىن ورىن سۇرانىسىن تۋعىزدى.
شەتەلدىكتەردىڭ كولىك، قوعامدىق ترانسپورت، تاماقتانۋ، ساۋدا-ساتتىققا جۇمساعان شىعىندارى قالا بيۋدجەتىنە ايتارلىقتاي پايدا اكەلدى.
دجەننيفەر لوپەس - 27 مىڭ كورەرمەن، ونىڭ 7 مىڭى - شەتەلدىكتەر
الماتىداتاعى ءبىر الەمدىك جۇلدىز - دجەننيفەر لوپەستىڭ قاتىسۋمەن وتكەن كونسەرت كوپتىڭ ەسىندە. 10 تامىزدا ورتالىق ستاديوندا وتكەن الەمدىك شوۋعا 27 مىڭ كورەرمەن جينالىپ، ونىڭ 7 مىڭى 35 ەلدەن كەلگەن. بيلەت باعاسى – 40 000–180 000 تگ.
ۇيىمداستىرۋشىلاردىڭ كەلتىرگەن دەرەكتەرى بويىنشا ، ءىس-شارادان تۇسكەن سالىق كولەمى – 600 ملن تەڭگە.
تۋريزم باسقارماسىنىڭ ۇسىنعان مالىمەتىنە ساي، 2025 جىلدىڭ ون ايىندا تۋريزمنەن تۇسكەن سالىق مولشەرى: 67،4 ملرد تەڭگە - بۇل وتكەن جىلمەن سالىستىرعاندا 27،4% كوپ. بۇل سالاداعى بيزنەس بەلسەندىلىگىنىڭ ارتقانىن كورسەتەدى.
تۋريستەر گەوگرافياسى جانە شىعىندارى
2025 جىلدىڭ العاشقى التى ايىندا الماتىعا ەڭ كوپ كەلگەن ەلدەر:
- ءۇندىستان – 56 206 تۋريست (17،3%)
- جۇڭگو - 54 125 تۋريست (16،7%)
- تۇركيا - 17 974 (5،5%)
- كورەيا رەسپۋبليكاسى - 9 725 (2،2%)
- اقش - 9 655 (1،6%)
Mastercard دەرەكتەرىنە سايكەس:
- تۋريست الماتىدا ورتا ەسەپپەن 3،5 كۇن ايالدايدى
- تاۋلىگىنە 441 دوللار جۇمسايدى
كەىنگى ءۇش جىلداعى ءوسىم ديناميكاسى
الماتى وسىلايشا جىل سايىن تۇراقتى ءوسىم كورسەتىپ كەلەدى:
- 2022 - 1 809 000 تۋريست
- 2023 - 2 000 000
- 2024 - 2 340 000
"قايرات" - "رەال مادريد" ءماچى: مىڭداعان شەتەلدىك تۋريست
بيىل الماتىدا الەم نازارىن اۋدارتقان تاعى ءبىر ماڭىزدى وقيعا - "قايرات" پەن "رەال مادريد" كەزدەسۋى بولدى. 26-29 قىركۇيەكتە وتكەن تاريحي ماچ الماتىعا 5 مىڭنان استام شەتەلدىك قوناق اكەلدى.
قازاقستاننىڭ باسقا وڭىرلەرىنەن كەلگەن جانكۇيەرلەردى قوسقاندا، كەلۋشىلەر سانى ونداعان مىڭ ادامعا جەتتى.
تۋريستەردىڭ نەگىزگى لەگى جۇڭگو، ءۇندىستان، رەسەي، ق ر وڭىرلەرى، جاپونيا، ۇلىبريتانيا، يسپانيا، چەحيا جانە باسقا دا ەۋروپا ەلدەرىنەن كەلگەن.
Mastercard مالىمەتىنشە، ماچ ءۇشىن كەلگەن ءبىر شەتەلدىك تۋريست ورتاشا ەسەپپەن 1 500 دوللارعا شىعىندانعان.
ولاردىڭ تۇرۋ، تاماقتانۋ، كولىك، ويىن-ساۋىق، ساۋداعا جۇمساعان قاراجاتى قالا ەكونوميكاسىنا ايتارلىقتاي اسەر ەتكەن، شاعىن جانە ورتا بيزنەستى جانداندىردى.