تۇركيالىق عالىم، مەملەكەت جانە قوعام قايراتكەرى يبراھيم كالىننىڭ تانىمال ەڭبەگى قازاق تىلىندە جارىق كوردى دەپ حابارلايدى almaty-aqshamy.kz.
تۇرىك دۇنيەسىنە اتى بەلگىلى اۆتوردىڭ يسلام مەن باتىستىڭ قارىم-قاتىناس تاريحىنا شولۋ جاساعان «مەن، وزگە جانە وزگەسى» اتتى ەڭبەگى قازاقستاندىق وقىرماندارعا جول تارتتى.
اتالعان كىتاپتىڭ تانىستىرىلىمى بۇگىن، 30 قاراشا كۇنى الماتىداعى «قازاقستان» قوناقۇيىندە ءوتتى. وعان قازاقستان مەن تۇركيانىڭ ديپلوماتتارى، عالىمدار مەن زەرتتەۋشىلەرى، زيالى قاۋىم وكىلدەرى جانە ب ا ق وكىلدەرى قاتىستى. قاتارىندا تۇركيا رەسپۋبليكاسىنىڭ الماتى قالاسىنداعى باس كونسۋلى ەۆرەن مۇددەريسوعلۋ، ق.ا.ياسساۋي ۋنيۆەرستەتى وكىلەتتى كەڭەسىنىڭ ءتوراعاسى مۇحيتتين شىمشەك، ەۋرازيا عىلىمي-زەرتتەۋ ينيستيتۋتىنىڭ ديرەكتورى سۋات بەي
دوكتور ءارى پروفەسسور ي.كالىننىڭ بۇل ەڭبەگى يسلام مەن باتىس الەمنىڭ 14 عاسىرلىق ءوزارا قارىم-قاتىناسىنا شولۋ جاساي وتىرىپ، بىر-بىرىنە ىقپال ەتۋشى ەكى الەمدە قالىپتاسقان كوزقاراستاردى باعالاۋعا باعىتتالعان. بىلايشا ايتقاندا ۇنەمى كەرەعار، ءبىر-بىرىن «جوققا شىعارۋشى» سانالاتىن ەكى كەڭىستىكتىڭ شىن مانىندە ۇزاق تاريح بويىندا ۇدايى اسەرلەسىپ، ءبىر تاراپ كەلەسى تاراپتىڭ ءوزىن تانۋىنا ىقپال ەتىپ وتىرعانىن سەنىمدى دالەلدەرمەن تۇسىندىرۋگە تىرىسقان.
كىتاپتىڭ تانىستىرىلىمى كەزىندە اۆتور تۇركيادان ۆيدەو-سالەمدەمە جولدادى. وندا ءوز ەڭبەگىن قازاق وقىرماندارىنا جەتكىزۋگە ەڭبەك ەتكەن عىلىم ورداسىنا راحمەت ايتتى. سونداي-اق، ەۋروسەنتريستىك كوزقاراستان ادا تۇرىپ، يسلام مەن باتىس وركەنيەتىنىڭ تاريحىنا جاڭا كوزقاراس ورناتۋعا بولاتىنىن وسى كىتاپ ارقىلى قازاق وقىرماندارىنا جەتكىزگىسى كەلەتىنىن ايتتى.
اتالمىش اۋقىمدى عىلىمي ەڭبەكتى قازاق ءتىلدى اۋديتورياعا جەتكىزۋگە سەبەپ بولعان ق.ا.ياسساۋي اتىنداعى حقتۋ-نە قاراستى ەۋرازيا عىلىمي-زەرتتەۋ ينستيتۋتى ەكەنىن ايرىقشا اتاي كەتكەن ءجون. اتالعان عىلىم ورداسى بۇعان دەيىن دە ءدال وسىنداي اۋقىمدى ءارى سالماقتى ەڭبەكتەردى قازاق تىلىنە اۋدارىپ كەلەدى. ي.كالىننىڭ بۇل ەڭبەگى ينستيتۋت تارابىنان شىعارىلعان 38ء-شى كىتاپ بولدى.
600 بەتتەن اساتىن، 10 تاراۋدان تۇراتىن عىلىمي ەڭبەكتى قازاق تىلىنە اۋدارعان اتالعان ينستيتۋتىنىڭ اعا عىلىمي قىزمەتكەرى ومىربەك قاناي. تانىستىرىلىم كەزىندە ول كىتاپتى قازاق ءتىلدى عىلىمي ورتاعا بارىنشا تۇسىنىكتى جەتكىزۋگە كۇش سالعانىن، ءارى ورىس ءتىلىنىڭ اسەرىندە بۇرمالانىپ جۇرگەن عىلىمي اتاۋلاردى بارىنشا ءتۇپ نۇسقاسىندا بەرۋگە تىرىسقانىن جەتكىزدى. ءو.قاناي كولەمدى ەڭبەكتە قامتىلعان تاقىرىپتاردىڭ ءار الۋاندىلىعىنا بايلانىستى كەيدە ادەبي اۋدارما جاساۋعا تۋرا كەلگەنىن، سوندىقتان ونداعى بايىرعى جىر-داستانداردى قازاقتىڭ پوەزيا تىلىندە جەتكىزۋگە كۇش سالعانىن دا ايتادى.
يبراھيم كالىن – تۇرىك عالىمى، مەملەكەت جانە قوعام قايراتكەرى، ديپلومات. يسلام تاريحى، باتىس پەن يسلام الەمى قارىم-قاتىناسى، تۇركيانىڭ سىرتقى ساياساتىنا قاتىستى ءبىرقاتار عىلىمي ەڭبەكتەردىڭ اۆتورى. تۇركيا رەسپۋبليكاسى پرەزيدەنتىنىڭ رەسمي وكىلى، پرەزيدەنت جانىنداعى قاۋىپسىزدىك جانە سىرتقى ساياسات كوميتەتى ءتوراعاسىنىڭ ورىنباسارى جانە پرەزيدەنتتىڭ باس كەڭەسشىسى ءتوراعاسىنىڭ ورىنباسارى سىندى ءبىرقاتار لاۋازىمدى قىزمەتتەر اتقارعان. بيىل مامىر ايىنان باستاپ تۇركيانىڭ ۇلتتىق بارلاۋ قىزمەتىنىڭ باسشىسى قىزمەتىن اتقارىپ كەلەدى.