ەۋرازيالىق دامۋ بانكى (ەادب) الماتى جەو-3 جاڭعىرتۋ جۇمىستارىن قارجىلاندىرادى، بۇل جۇمىستار اياسىندا ستانسيا نەگىزگى وتىنى رەتىندە كومىردەن تابيعي گازعا اۋىستىرىلادى. ءتيىستى كەلىسىمگە ەادب مەن «الماتى ەلەكتر ستانسيالارى» اق (الەس) قول قويىلدى، دەپ حابارلايدى almaty-akshamy.kz ەادب باسپا ءسوز قىزمەتىنە سىلتەمە جاساپ.
«سامۇرىق-ەنەرگو» اق (الەس باس كومپانياسى) جۇزەگە اسىرىپ وتىرعان الماتى جەو-3 جاڭعىرتۋ جوباسى 500 مۆت بۋگاز قۇرىلعىسىن ورناتۋ ناتيجەسىندە ەلەكترستانسيانىڭ قۋاتتىلىعىن كۇشەيتەتىن جانە ەپتىلىگىن ارتتىراتىن تۇبەگەيلى جاڭارتۋدى قاراستىرعان. جاڭارعان جەو ەلەكتر جانە جىلۋ ەنەرگيالارىن قۇرامداستىرىلعان تۇردە وندىرەدى.
قارجىلاندىرۋ ماقساتىندا «استانا» حالىقارالىق قارجى ورتالىعىنىڭ بيرجاسىندا الەس تۇراقتى دامۋ وبليگاسيالارى (Sustainability – Linked Bond، SLB) شىعارىلاتىن بولادى. جالپى نومينالدى كولەمى 236،8 ملرد تەڭگەگە دەيىن تۇراقتى دامۋمەن بايلانىستى الەس ءبىرىنشى وبليگاسيالىق باعدارلاماسى 2023 جىلدىڭ قىركۇيەگىندە تىركەلگەن. اندەررايتەرى «Sky Bridge Invest» اق. باعدارلاما – ورتالىق ازياداعى تۇراقتى دامۋ وبليگاسيالارىنىڭ ەڭ ءىرى شىعارىلىمى.
«ەادب الماتى جەو-3 جاڭعىرتۋ جۇمىسى سياقتى جوبالاردى جۇزەگە اسىرۋعا باعىتتالعان، بۇل تۇرعىدا ءبىز بىرنەشە ماڭىزدى اسپەكتىنى ايرىقشا بەلگىلەيمىز. بىرىنشىدەن، جارامدىلىعى بىتكەن، توزعان كومىر ەنەرگەتيكالىق قازاندىقتارىن زاماناۋي، ەكولوگيالىق تازا تابيعي گازبەن جۇمىس ىستەيتىن بۋگاز قۇرىلعىلارعا اۋىستىرۋ ارقىلى ءبىز قازاقستاننىڭ ءىرى قالاسىنداعى ەكولوگيالىق احۋالدى جاقسارتامىز. بۇل بانك ۇستانعان تۇراقتى دامۋ پرينسيپتەرىمەن تولىعىمەن سايكەس كەلەدى. ەكىنشىدەن، ورتالىق ازياداعى سۋ-ەنەرگەتيكالىق كەشەندى دامىتۋ بويىنشا ءبىزدىڭ ءىرى ينۆەستيسيالىق مەگاجوبامىزدىڭ جۇزەگە اسىرىلۋى بارىسىندا ەادب جوبا باستاۋىنداعى جۇمىستارعا گرانتتار ءبولۋ جانە قارجى بەرۋ ارقىلى مەملەكەتتەرگە ەنەرگەتيكالىق قاۋىپسىزدىككە قول جەتكىزۋدە بەلسەندى تۇردە كومەكتەسۋدە. اقىرىندا، ءبىز كاپيتال تارتۋدا جاڭا مەحانيزمدەردى جاساۋدا بەلسەندى قولداۋ كورسەتىپ، Sustainability – Linked Bond تۇراقتى دامۋ وبليگاسيالارىن شىعارۋعا قۋانا قاتىسۋدامىز»، - دەيدى ەادب باسقارما ءتوراعاسىنىڭ ورىنباسارى رۋسلان دالەنوۆ.
انىقتاما:
ەۋرازيالىق دامۋ بانكى — حالىقارالىق قارجى ۇيىمى، ەۋرازيا كەڭىستىگىندە ينۆەستيسيالىق قىزمەتتى جۇزەگە اسىرادى. 17 جىلدان استام ەادب قاتىسۋشى مەملەكەتتەردىڭ جان-جاقتى دامۋىنا جانە ەكونوميكالىق بايلانىستارىنىڭ كەڭەيۋى مەن نىعايۋىنا قولداۋ كورسەتۋدە. ەادب جارعى كاپيتالى 7 ملرد اقش دوللارىنا تەڭ. ەادب پورتفەلىنىڭ نەگىزگى بولىگىن كولىك ينفراقۇرىلىمى، سيفرلىق جۇيەلەر، جاسىل ەنەرگەتيكا، اۋىل شارۋاشىلىعى، ءوندىرىس جانە ماشينا جاساۋ سالالارىنداعى ينتەگراسيالىق جوبالار قۇرايدى. ءوزىنىڭ قىزمەتىندە بانك بۇۇ تۇراقتى دامۋ وبلىسىنداعى ماقساتتارىن جانە ESG پرينسيپتەرىن باسشىلىققا الادى.
«الماتى ەلەكتر ستانسيالارى» اق (الەس) – ەنەرگيا ءوندىرۋ ۇيىمى، الماتى قالاسى جانە الماتى وبلىسىندا جىلۋ جانە ەلەكتر ەنەرگياسىن ءوندىرۋ بويىنشا قىزمەتتى اتقارادى. «سامۇرىق-ەنەرگو» اق ەلەكتروەنەرگەتيكالىق حولدينگتىڭ قۇرامىنا كىرەدى. الەس ەلەكتر جانە جىلۋ ەنەرگياسىمەن الماتى ايماعىنىڭ 70% تۇتىنۋشىسىن قامتاماسىز ەتەدى. كومپانيا قۇرامىندا - 1-جەو، 2-جەو، 3-جەو، باتىس جىلۋ كەشەنى، قاپشاعاي گەس، كاسكاد الماتىلىق گەس، «ەنورگوجوندەۋ» وندىرىستىك جوندەۋ كاسىپورنى، وقتو (وتىندى قابىلداۋ جانە ءتۇسىرۋ ورتالىعى).
«سامۇرىق-ەنەرگو» اق – قازاقستانداعى ءىرى ەلەكترەنەرگيالىق حولدينگ. قىزمەتىنىڭ نەگىزگى باعىتتارى: ەلەكتر جانە جىلۋ ەنەرگياسىن ءوندىرۋ؛ ەلەكترەنەرگياسىن بەرۋ، رەتتەۋ جانە ساتۋ؛ ەنەرگەتيكالىق كومىردى ءوندىرۋ. حولدينگ قۇرامىنا ەنەرگەتيكالىق جانە كومىر كاسىپورىندارى كىرەدى، ولاردىڭ ىشىندە «ەكىباستۇز 1-ماەس» ج ش س، «ەكىباستۇز 2-ماەس ستانسياسى» اق، «بوگاتىر كومىر» ج ش س، «الماتى ەلەكتر ستانسيالارى» اق، «مويناق سەس» اق، «شاردارا سەس» اق جانە ت. ب. حولدينگ 2007 جىلى قۇرىلعان. اكسيالار (100%) يەسى «سامۇرىق - قازىنا» اق.