مەملەكەتتىك قىزمەتكە تۇرۋ ءۇشىن قازاق ءتىلىن ءبىلۋ مىندەتتەلەدى. بۇل تۋرالى قازاقستان رەسپۋبليكاسىندا ءتىل ساياساتىن دامىتۋدىڭ 2023–2029 جىلدارعا ارنالعان تۇجىرىمداسىندا جازىلدى، دەپ حابارلايدى اlmaty-akshamy.kz BAQ.KZ-كە سىلتەمە جاساپ.
- مەملەكەتتىك قىزمەتشىلەر مەن قىزمەت كورسەتۋ ورگاندارىنا، ت.ب قىزمەتكەرلەرگە قىزمەتكە ورنالاسۋ بارىسىندا «قازتەست» جۇيەسى ارقىلى تەست تاپسىرۋ زاڭنامالىق تۇرعىدا مىندەتتەلمەگەن. اتالعان ماسەلەنى قولدانىستاعى نورماتيۆتىك-قۇقىقتىق اكتىلەرگە ءتيىستى وزگەرىستەر ەنگىزۋ ارقىلى شەشۋ قاجەت ەتىلەدى، - دەلىنگەن تۇجىرىمدامادا.
قۇجاتتا بۇل ۇسىنىستىڭ قاشان قولعا الىناتىنى كورسەتىلمەگەن.
- الەمدىك تاجىريبە كورسەتىپ وتىرعانداي، بۇگىندە جۇڭگو، اقش، فينليانديا، وڭتۇستىك كورەيا جانە گرۋزيادا مەكتەپ ءبىتىرۋشى تۇلەكتەر جوعارعى وقۋ ورنىنا تۇسەر كەزدە مىندەتتى ءپان رەتىندە وزدەرىنىڭ انا ءتىلى مەن ادەبيەتىنەن ەمتيحان تاپسىرادى. بۇل ءوز كەزەگىندە جاس بۋىننىڭ تىلدىك ورتاعا كەدەرگىسىز ارالاسۋىنا مۇمكىندىك بەرىپ، ۇلتتىق قۇندىلىقتاردى باعالاۋىنا، ءوز ەلىنىڭ ءتىلى مەن مادەنيەتىن تەرەڭ ۇعىنۋىنا ىقپال ەتەدى. اتالعان ەلدەر تىلدىك ساياسات ماسەلەسىن وسىنداي تەتىكتەر ارقىلى شەشىپ وتىر، - دەلىنگەن مالىمدەمەدە.
سونىمەن قاتار قازىرگى تاڭدا «قازاقستان رەسپۋبليكاسىنىڭ ازاماتتىعى تۋرالى» زاڭعا مەملەكەتتىك ءتىلدى، قازاقستاننىڭ تاريحى نەگىزدەرىن جانە ۇلتتىق زاڭنامانى ءبىلۋ قاجەتتىگى تۋرالى قولدانىستاعى نورماتيۆتىك-قۇقىقتىق اكتىلەرگە وزگەرىستەر ەنگىزىلۋدە.
- مەملەكەتتىك جانە مەملەكەتتىك ەمەس ۇيىمداردا قىزمەت ەتەتىن سالا ماماندارىنىڭ مەملەكەتتىك ءتىلدى مەڭگەرۋ دەڭگەيىن انىقتاۋ ماقساتىندا «قازتەست» سەرتيفيكاتىن مىندەتتەيتىن نورمالاردى ەنگىزۋ پىسىقتالاتىن بولادى، - دەلىنگەن حابارلامادا.