مەملەكەتتىڭ ماسەلەسىن مەملەكەتتىك تىلدە ايتۋىمىز كەرەك – قاسىم-جومارت توقايەۆ

قازاق تىلىندەگى سۇحباتتىڭ ءوز اۋديتورياسى بار.

مەملەكەتتىڭ ماسەلەسىن مەملەكەتتىك تىلدە ايتۋىمىز كەرەك. بۇل تۋرالى «Qazaqstan» تەلەارناسىنا سۇحبات بەرگەن ق ر پرەزيدەنتى قاسىم-جومارت توقايەۆ ايتتى، دەپ حابارلايدى Almaty-akshamy.kz.

سۇحبات بارىسىندا تەلەارنا ءتىلشىسى مەملەكەت باسشىسىنىڭ العاشقى سۇحباتى ورىس تىلىندە بولعانىن ايتا كەلە، مۇنىڭ قازاق ءتىلىن كەمسىتۋ ەمەس پە دەپ سۇرادى.

«بۇل ەشقانداي كەمسىتۋ ەمەس. ەشقانداي مەنسىنبەۋشىلىك تە ەمەس دەپ ايتۋعا بولادى. كوپتەگەن ارنا وسىعان دەيىن مەنەن بىرنەشە رەت سۇحبات بەرۋدى سۇراعان. مەن ولاردىڭ ەشقايسىسىنا كەلىسكەن جوقپىن. كەيىن تەك «حابار» ارناسىنا عانا سۇحبات بەرەمىن دەپ شەشتىم. سەبەبى ەل ىشىندە كوپتەگەن جالعان اقپارات تاراپ جاتتى. سولارعا توقتاۋ سالۋ كەرەك بولدى. ول سۇحبات ەڭ الدىمەن الەم جۇرتشىلىعىنا قازاقستانداعى احۋال جونىندە شىنايى اقپارات بەرۋ ءۇشىن جاسالدى. سودان كەيىن شەتەلدىك اقپارات قۇرالدارى سۇحباتىمدى كەڭىنەن تاراتىپ، بارىنشا پايدالاندى. قالاي بولسا دا، ورىس ءتىلى - بىرىككەن ۇلتتار ۇيىمىنىڭ 6 رەسمي ءتىلىنىڭ ءبىرى. ونى مويىنداۋىمىز كەرەك. ال قازاق تىلىندەگى سۇحباتتىڭ ءوز اۋديتورياسى بار. جالپى، مەملەكەتتىڭ ماسەلەسىن مەملەكەتتىك تىلدە ايتۋىمىز كەرەك. ءتىلىمىز بىزدەن باسقا ەشكىمگە كەرەگى جوق. سوندىقتان ەڭ الدىمەن ءوزىمىز وعان قۇرمەت كورسەتۋىمىز كەرەك دەپ ويلايمىن» – دەدى قاسىم-جومارت توقايەۆ.