الماتى وبلىسى تالعار اۋدانىندا ورنالاسقان قوقىس پوليگونىندا مەملەكەتتىك رامىزدەر تابىلدى.
قوقىس اراسىندا جاتقان بىرنەشە ەلتاڭبا مەن مەملەكەتتىك تۋدىڭ بەينەجازباسى الەۋمەتتىك جەلىلەردە تارادى، دەپ حابارلايدى aqshamnews.kz.
اۋدان اكىمدىگىنىڭ مالىمەتىنە سايكەس، بەينەجازبا تالعار اۋدانىنا قاراستى قاينار اۋىلدىق وكرۋگىنىڭ ەركىن اۋىلىنىڭ اۋماعىندا ورنالاسقان قوقىستا تۇسىرىلگەن.
— اكىمدىك قىزمەتكەرلەرى پوليگون الاڭىن تەكسەردى. تەكسەرۋ كەزىندە اتالعان مەملەكەتتىك رامىزدەردىڭ جانىندا ءبىلىم بەرۋ مەكەمەسى — كوللەدجدىڭ قۇجاتتارى بار ەكەنى انىقتالدى. باسقا ءمان-جايلار انىقتالىپ جاتىر. قازىرگى ۋاقىتتا پوليگون ورنىنان مەملەكەتتىك رامىزدەر الىنىپ تاستالدى. اتالعان مەملەكەتتىك رامىزدەر تالعار اۋدانىنىڭ مەملەكەتتىك مەكەمەلەرىنە تيەسىلى ەمەس، — دەپ حابارلادى اكىمدىكتەن.
ال الماتى وبلىسىنىڭ پوليسيا دەپارتامەنتى مەملەكەتتىك رامىزدەردى قورلاۋ فاكتىسى بويىنشا پوليسيا قىلمىستىق ءىس قوزعالعانىن مالىمدەدى.
— تالعار اۋداندىق پوليسيا قىزمەتكەرلەرى بولعان وقيعانىڭ بارلىق ءمان-جايلارىن انىقتاۋ ءۇشىن قاجەتتى جەدەل ءىس-شارالار ۇيىمداستىردى. كىنالى ادامدارعا قولدانىستاعى زاڭناماعا سايكەس ءتيىستى شارالار قابىلداناتىن بولادى، — دەپ حابارلادى وبلىستىق پد باسپا ءسوز قىزمەتى.