الماتىنىڭ №2 قالالىق بالالار كلينيكالىق اۋرۋحاناسىنىڭ رەانيماتولوگ-دارىگەرى گۇلبانۋ بەردياروۆا اتا-انالار مەن جاسوسپىرىمدەرگە شۇعىل ۇندەۋ جولدايدى. موپەدپەن ءجۇرۋ ەرەجەلەرىن تولىققاندى بىلمەي جاتىپ تىزگىندەۋگە بولمايدى دەيدى مامان.
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرىنە سۇيەنسەك، جول-كولىك وقيعالارى سالدارىنان بولاتىن ولىم-جىتىمگە كوبىنە 15-29 جاس ارالىعىنداعى جاستار سەبەپكەر كورىنەدى. دالىرەك ايتساق، جىلىنا 1،3 ميلليوننان استام ادامنىڭ ءومىرى جول ۇستىندە قيىلادى. بۇل ساننىڭ ەداۋىر بولىگى موتوسيكل مەن موپەد مىنگەندەردىڭ ۇلەسىندە ەكەندىگى دە جاسىرىن ەمەس. گۇلبان بەردياروۆانىڭ ايتۋىنشا، مۇنداي توسىن اپاتتار ادام عۇمىرىن ءۇزىپ قانا قويماي، جاستاردىڭ جانە ولاردىڭ جاقىندارىنىڭ ءومىرىن تۇبەگەيلى وزگەرتەتىن اۋىر جاراقاتتارعا اكەلەدى.
دارىگەر موپەدىمەن بىرگە اۋدارىلىپ تۇسكەن 17 جاستاعى ناۋقاس تۋرالى ايتىپ بەردى. ءجاسوسپىرىمنىڭ ەكى جاعىنان دا جامباس سۇيەكتەرى (لوننو-سەدالدىق، مىقىن سۇيەكتەرى) سىنعان. سونداي-اق «بەلومىرتقاسىنىڭ جابىق قىسۋ-سىنۋى، بەلومىرتقاسىنىڭ بەس ارتقى دوعاسى؛ وڭ جاقتاعى يىقتىڭ سىنۋى؛ ءىش مۇشەلەرىنىڭ كوگەرۋى؛ مەمبرانالىق بولىكتەگى نەسەپاعاردىڭ زاقىمدانۋى؛ ۋرەترانىڭ جاراقاتتان كەيىنگى جىرتىلۋى؛ 3-دارەجەلى تراۆماتيكالىق شوك، 2-دارەجەلى پوستگەمورراگيالىق شوك» دەگەن دياگنوز قويىلعان.
ناۋقاستىڭ ءومىرىن ساقتاۋ ءۇشىن دارىگەرلەر ءۇش وتا جاسادى. ءجاسوسپىرىمنىڭ بەتى ەكى ايدان كەيىن عانا بەرى قارادى. بۇگىنگى كۇنى جاعدايى تۇراقتى. ول ەكى جامباس بۋىندارىنىڭ دامىعان كونتراكتۋرالارىنا جانە جامباس سۇيەكتەرىنىڭ شوعىرلانعان بىرنەشە سىنۋىنا بايلانىستى وڭالتۋدى جالعاستىرۋدا. ناۋقاستى ۋرەترانىڭ جارىلۋىنا بايلانىستى قۋىقتىڭ تۇتاستىعىن قالپىنا كەلتىرۋ ءۇشىن ءالى دە كەزەڭدىك وتالار كۇتىپ تۇر.
– جاقىندا بىزگە موپەدپەن كەلە جاتىپ اپاتقا تۇسكەن 17 جاستاعى تاعى ءبىر ناۋقاس اسا اۋىر جاعدايدا جەتكىزىلدى. وعان ءۇش ەمەس، جەتى وتا جاسالدى. الايدا، دارىگەرلەر جۇمساعان بارلىق كۇش-جىگەرگە قاراماستان، ءجاسوسپىرىمنىڭ وڭ بۇيرەگىن ساقتاي المادىق. بوزبالانىڭ جاعدايى تۇراقتاندىرىلدى. ءبىراق دەنساۋلىعى قالپىنا كەلۋى ءۇشىن ءالى ۇزاق ۋاقىت كەرەك. سونداي-اق ونى پسيحولوگتارمەن دە جۇمىس كۇتىپ تۇر. وكىنىشكە وراي، وسىنداي جول اپاتىنان زارداپ شەككەن جاستاردىڭ كوبىندە فيزيكالىق جانە پسيحولوگيالىق زارداپتار ءومىر بويىنا قالادى. موپەدتەر مەن ساموكاتتاردى جۇرگىزەتىن جاسوسپىرىمدەر وسى ءبىر كولىك قۇرالدارىن باسقارۋعا ءاتۇستى قارايتىنى وكىنىشتى. ولار قىزۋقاندىلىقپەن جەلىگىپ، ءقاۋىپتى مانيەۆرلەر جاسايمىز دەپ، جازاتايىم وقيعالارعا ۇشىراپ جاتادى. قۇرمەتتى اتا-انالار جانە جاستار، موپەد – ويىنشىق ەمەس، ونى دا تىزگىندەۋدىڭ ەرەجەلەرىن بىلگەن ابزال. موپەد اپاتتارىنىڭ كوبىنە مۇگەدەك ەتەتىنىن ەستە ۇستاعان ابزال، – دەيدى №2 قالالىق بالالار كلينيكالىق اۋرۋحاناسىنىڭ رەانيماتولوگ-دارىگەرى گۇلبانۋ بەردياروۆا.