2020 جىلمەن سالىستىرعاندا 12%-عا ارتقان.
قازاقستان ۇكىمەتى حالىققا نەعۇرلىم ىڭعايلى جانە زاماناۋي تۇردە قامتاماسىز ەتۋ ءۇشىن مەملەكەتتىك قىزمەتتەردى سيفرلاندىرۋ جۇمىسىن جۇرگىزىپ جاتىر. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ ۇكىمەت وتىرىسىندا ايتتى، دەپ حابارلايدى Almaty-akshamy.kz.
ەڭبەكمينىنىڭ باسشىسى ءوز ءسوزىنىڭ باسىندا الەۋمەتتىك-ەڭبەك سالاسىندا 45 مەملەكەتتىك قىزمەت كورسەتىلەتىنىن اتاپ ءوتتى. مينيسترلىك حالىققا نەعۇرلىم ىڭعايلى جانە زاماناۋي تۇردە قامتاماسىز ەتۋ ءۇشىن ولاردى سيفرلاندىرۋ بويىنشا كەشەندى شارالار قابىلداۋدا.
«وتكەن جىلى اعىمداعى بيزنەس-پروسەستەرگە جۇرگىزىلگەن تالداۋ ناتيجەسىندە مەملەكەتتىك قىزمەتتەردىڭ دامۋىن تەجەيتىن ءبىرقاتار فاكتورلار انىقتالدى. اتاپ ايتقاندا، ولار - زەينەتاقى مەن جاردەماقى تاعايىنداۋ ءۇشىن قاجەتتى «تاريحي» دەرەكتەردىڭ بولماۋى، ءموبيلدى ازاماتتار بازاسىندا تىركەۋدىڭ بولماۋى. وسىعان بايلانىستى ءبىز مەملەكەتتىك قىزمەت كورسەتۋ ۇدەرىستەرىن رەينجينيرينگ جانە ترانسفورماسيالاۋ بويىنشا جۇمىس جۇرگىزۋدەمىز.
بۇگىنگى كۇنى ەلەكتروندىق فورماتتا 45 مەملەكەتتىك قىزمەتتىڭ 42 ءتۇرى نەمەسە 93% ۇسىنىلادى، ونىڭ ىشىندە 21 قىزمەتتى نەمەسە 43% پرواكتيۆتى تۇردە الۋعا بولادى.
2021 جىلى الەۋمەتتىك-ەڭبەك سالاسىندا بارلىعى 12،6 ملن مەملەكەتتىك قىزمەت كورسەتىلدى، ونىڭ ىشىندە 9،1 ملن نەمەسە 72% ەلەكتروندىق تۇردە كورسەتىلدى. بۇل 2020 جىلمەن سالىستىرعاندا 12% - عا ارتىق. 2025 جىلعا قاراي ءبىز بارلىق مەملەكەتتىك قىزمەتتەردى 100% ەلەكتروندى فورماتقا كوشىرۋدى جوسپارلادىق»، – دەدى سەرىك شاپكەنوۆ.
مينيستر سونداي-اق، حالىقتىڭ قىزمەت الۋ مۇمكىندىكتەرىن كەڭەيتۋ ماقساتىندا وتكەن جىلدىڭ قازان ايىندا ەڭبەكمينى ەكى بانكپەن بىرلەسىپ، ولاردىڭ پلاتفورمالارىندا بالا تۋۋعا بايلانىستى مەملەكەتتىك قىزمەتتەر كورسەتۋ بويىنشا سەرۆيستەردى ىسكە اسىرعانىن اتاپ ءوتتى. تەك 2021 جىلدىڭ ءتورتىنشى توقسانىندا بالالارى بار 16،5 مىڭنان استام وتباسى ۇيدە وتىرىپ، ەدب ءموبيلدى قوسىمشالارى ارقىلى قىزمەت الدى. وسى پراكتيكانى باسقا بانكتەردىڭ ءموبيلدى قوسىمشالارى ارقىلى ەنگىزۋ جونىندەگى جۇمىس جالعاساتىن بولادى.
«مەملەكەتتىك قىزمەتتەردى الۋ راسىمدەرىن وڭتايلاندىرۋ ماقساتىندا 17 قىزمەت ءتۇرى بويىنشا ەكساۋماقتىق قاعيداتىن ەنگىزىلدى. ياعني، ازاماتتار ورنالاسقان جەرىنە قاراماستان، مەملەكەتتىك قىزمەتتى الۋ ءۇشىن كەز كەلگەن حالىققا قىزمەت كورسەتۋ ورتالىعىنا جۇگىنە الادى. مىسالى، نۇر-سۇلتان قالاسىنىڭ تۇرعىنى ۋاقىتشا الماتىدا تۇرىپ، كەز كەلگەن حالىققا قىزمەت كورسەتۋ ورتالىعىنا بارىپ، وزىنە تيەسىلى الەۋمەتتىك تولەمدى الۋعا ءوتىنىش بەرە الادى. 2021 جىلدىڭ ءتورتىنشى توقسانىندا 22،6 مىڭنان استام ازامات ەكساۋماقتىق قاعيدات بويىنشا قىزمەت الدى.
سونداي-اق، وپەراسيالىق شىعىنداردى ۇنەمدەۋ ماقساتىندا ءبىز ءبىر ازاماتقا تاعايىندالعان بىرنەشە الەۋمەتتىك تولەمدەردى ءبىر تولەمگە بىرىكتىرىپ اۋدارۋدى جۇزەگە اسىردىق. سونىڭ ارقاسىندا 2021 جىلدىڭ 7 ايىندا 3 ملرد. تەڭگە ۇنەمدەدىك، ال جىل سايىن 6 ملرد. تەڭگە ۇنەمدەلەتىن بولادى»، – دەدى سەرىك شاپكەنوۆ.