ءبىزدىڭ بايتاق ەلىمىزدە 2016 جىلدىڭ 1 ناۋرىزىنان باستاپ العىس ايتۋ كۇنى اتاپ وتىلە باستادى. ءدال وسى كۇنى قازاقستان حالقى اسسامبلەياسى قۇرىلعاندىقتان، مەرەكەنىڭ ءمانى دە، ماڭىزى دا تەرەڭدەي تۇسكەندەي.
العىس ايتۋ كۇنىن مەرەكەلەۋدىڭ تاعى ءبىر ءتيىمدى تۇسى – «ماڭگىلىك ەل» بىرلىگىن ورتاق تاريح جانە تاريحي سانا نەگىزىندە نىعايتۋ مەن دامىتۋدىڭ مانماتىنىندە قازاقستاندىق قۇندىلىقتاردى بەينەلەيدى. وسىناۋ جىلىلىققا تولى العىس ايتۋ كۇنى – ەڭ الدىمەن ەلىمىزدە تىنىشتىق پەن ۇندەستىك، ءوزارا سەنىمدىلىك پەن بارلىق قازاقستاندىقتارعا دەگەن قۇرمەتتىڭ ورنىعۋىنا نەگىز بولعان بەيبىتشىلىك پەن كەلىسىم ساياساتىنىڭ سالتاناتتى كۇنى. بۇل – تاعدىر تالكەگىمەن قازاقستان جەرىنە ەرىكسىز قونىس اۋدارعان ءتۇرلى ەتنوستاردىڭ ميلليونداعان وكىلدەرىنىڭ قۇتتى قونىسىنا اينالعان قاسيەتتى قازاق جەرى مەن قوناقجاي قازاق حالقىنا تەرەڭ تاعزىمنىڭ بەلگىسى. قازاق حالقى سوناۋ قيىن-قىستاۋ زاماندا ولاردىڭ باسىنا تۇسكەن اۋىرتپالىقتى قايىسپاي بىرگە كوتەرە بىلسە، بۇل بۇگىنگى تاڭدا ەلىمىزدەگى ءتۇرلى ۇلت وكىلدەرىنىڭ اراسىنداعى ادامگەرشىلىك قارىم-قاتىناستىڭ ونەگەلى ولشەمىنە اينالدى.
العىس ايتۋ كۇنى – كۇردەلى زاماندى يىق تىرەسە بىرگە ەڭسەرىپ، قىسقا مەرزىم ىشىندە تاۋەلسىز قازاقستاندى قۇرۋ جولىندا ايانباي تەر توككەن ەلىمىزدىڭ بارلىق ازاماتتتارىنىڭ بىر-بىرىنە قۇرمەت بىلدىرەتىن كۇن.
ەلىمىزدەگى قازاقستان حالقى اسسامبلەياسى قۇرىلعان كۇن – 1 ناۋرىزدى جىل سايىن بارلىق ەتنوستاردىڭ بىر-بىرىنە مەيىرباندىق تانىتىپ، ول ادامداردى ءوز تۋعانىنداي قابىلداعان قازاقتارعا العىس ايتۋ كۇنى رەتىندە اتاپ ءوتۋى وتە ادىلەتتى قادام بولدى دەر ەدىم. بۇل كۇن ءبىزدى بۇرىنعىدان دا گورى جاقىنداستىرا ءتۇسىپ، مەيىرىمدىلىكتىڭ، بۇكىل قازاقستاندىقتاردىڭ بىر-بىرىنە دەگەن دوستىعى مەن ماحابباتىنىڭ جارقىن مەرەكەسىنە اينالدى. بۇل كۇن تاعدىر توعىستىرعان قازاقستاننىڭ كوپەتنوستى حالقىنىڭ ورتاق تاريحىن قۇرمەتتەۋ كۇنى بولادى.
العىس ايتۋ كۇنى – قايىرىمدىلىق داستۇرلەرىن، الەۋمەتتىك ىنتىماقتى جانە ءوزارا كومەك كورسەتۋدى قولداۋ كۇنى. بۇل – رەپرەسسيا مەن جەر اۋدارۋ جىلدارىندا ءبىزدىڭ قازاق حالقىنىڭ كورسەتكەن مەيىرىمدىلىك پەن اقكوڭىلدىك، قولدا بارمەن ءبولىسۋ، كومەك كورسەتۋ سىندى رۋحاني داستۇرلەرى كۇنى.
وسى كۇنى مەن ءوزىمنىڭ تۋعان وتانىما، تۋعان حالقىما اينالعان قازاق حالقىنا شەكسىز العىسىمدى بىلدىرەمىن. «قازاعىم باردا – مەن بارمىن!» دەپ تاعى دا ايتقىم كەلەدى.