2015 جىلعى 23 قاراشاداعى №416-V قرز «قازاقستان رەسپۋبليكاسىنىڭ مەملەكەتتىك قىزمەتى تۋرالى» زاڭىنا سايكەس، مەملەكەتتىك قىزمەت – بۇل مەملەكەتتىك قىزمەتشىلەردىڭ مەملەكەتتىك ورگانداردا مەملەكەتتىك بيلىكتىڭ مىندەتتەرى مەن فۋنكسيالارىن ىسكە اسىرۋعا باعىتتالعان لاۋازىمدىق وكىلەتتىكتەردى اتقارۋى.
مەملەكەتتىك قىزمەتتىڭ قۇقىقتىق نەگىزىن قازاقستان رەسپۋبليكاسىنىڭ كونستيتۋسياسى، قازاقستان رەسپۋبليكاسىنىڭ ەڭبەك كودەكسى، جوعارىدا اتالعان زاڭ، سونداي-اق باسقا دا نورماتيۆتىك قۇقىقتىق اكتىلەر قۇرايدى.
مەملەكەتتىك قىزمەتشى ءوز وكىلەتتىكتەرىن ادال جانە كاسىبي تۇردە جۇزەگە اسىرۋى ءتيىس. ول كەز كەلگەن جاعدايدا حالىقتىڭ، ەل ازاماتتارىنىڭ سەنىمىن جوعالتپاي جۇمىس ىستەۋى كەرەك. وسى ماقساتتا مەملەكەتتىك قىزمەتشىلەردىڭ نەگىزگى مىندەتتەرى ايقىندالعان.
مەملەكەتتىك قىزمەتشىلەردىڭ نەگىزگى مىندەتتەرى:
- قازاقستان رەسپۋبليكاسىنىڭ كونستيتۋسياسى مەن زاڭدارىن ساقتاۋ؛
- ازاماتتار مەن زاڭدى تۇلعالاردىڭ قۇقىقتارىن، بوستاندىقتارى مەن زاڭدى مۇددەلەرىن قورعاۋ جانە ولاردىڭ وتىنىشتەرىن زاڭنامادا بەلگىلەنگەن تارتىپپەن قاراۋ؛
- لاۋازىمدىق مىندەتتەردى ءتيىمدى ورىنداۋ ءۇشىن كاسىبي دەڭگەيىن جانە بىلىكتىلىگىن ارتتىرۋ؛
- لاۋازىمدىق وكىلەتتىكتەردى جۇزەگە اسىرۋ كەزىندە ساياسي پارتيالاردان، قوعامدىق جانە ءدىني بىرلەستىكتەردەن بەيتاراپ جانە تاۋەلسىز بولۋ؛
- قىزمەتتىك ءتارتىپتى ساقتاۋ جانە زاڭمەن قورعالاتىن قۇپيانى ساقتاۋ؛
- ازاماتتاردىڭ جەكە ومىرىنە قاتىستى اقپاراتتى جاريالاماۋ؛
- مەملەكەتتىك مۇلىكتىڭ ساقتالۋىن قامتاماسىز ەتۋ جانە ونى تەك قىزمەتتىك ماقساتتا پايدالانۋ؛
- سىبايلاس جەمقورلىق قۇقىق بۇزۋشىلىق جاعدايلارىن حابارلاۋ جانە ولاردىڭ الدىن الۋ؛
- قىزمەتتىك ادەپتى ساقتاۋ؛
- مەملەكەتتىك ورگاننىڭ اقپاراتتىق قاۋىپسىزدىگىن قامتاماسىز ەتۋ.
مەملەكەتتىك قىزمەتشىلەردىڭ باسقا دا مىندەتتەرى قازاقستان رەسپۋبليكاسىنىڭ زاڭدارىندا جانە قازاقستان رەسپۋبليكاسى پرەزيدەنتىنىڭ اكتىلەرىندە كورسەتىلۋى مۇمكىن.
مەملەكەتتىك قىزمەتشىلەر ادال قىزمەت اتقارۋ ارقىلى مەملەكەتتىك قىزمەتتىڭ بەدەلىن ارتتىرىپ، حالىقتىڭ سەنىمىن نىعايتا الادى. مەملەكەت قىزمەتىن نىعايتۋعا، زاڭدىلىقتىڭ ساقتالۋىنا جانە قوعامنىڭ وركەندەۋىنە ءاربىر مەملەكەتتىك قىزمەتشى ءوزىنىڭ ۇلەسىن قوسۋى ءتيىس.