2024 جىلدان باستاپ مەملەكەتتىك قىزمەتتىڭ «ب» كورپۋسىنا جۇمىسقا ورنالاسۋ ءۇشىن ىركتەۋ ونلاين فورماتتا جۇرگىزىلەدى.
بۇل تۋرالى ب ا ق وكىلدەرىنىڭ ساۋالىنا جاۋاپ بەرگەن مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءبىز «ە-قىزمەت» جۇيەسىن مودەرنيزاسيالادىق، ونىڭ سىرتقى پورتالىن اشتىق. قازىرگى كەزدە بۇل جۇيە 5 مەملەكەتتىك ورگاندا پيلوتتىق نەگىزدە جۇمىس ىستەپ تۇر. ياعني، بۇگىندە مەملەكەتتىك قىزمەتتىڭ «ب» كورپۋسىنا جۇمىسقا ورنالاسۋ ونلاين تۇردە بولادى. ەگەر بيىل «ە-قىزمەت» سىناقتان جاقسى وتەتىن بولسا، وندا 2024 جىلدان باستاپ بارلىق مەملەكەتتىك ورگاندارعا ەنگىزىلەتىن بولادى. كەلەر جىلدان باستاپ مەملەكەتتىك قىزمەتكە كىرەمىن دەگەن قازاقستان ازاماتتارى ونلاين وتەدى. ءقازىر كوپ ماسەلە كونكۋرستىق كوميسسيانىڭ شەشىمىنە بايلانىستى بولىپ وتىر. سوندىقتان ءبىز وسى جۇيەنى تولىق ەنگىزىپ، 2025 جىلى كونكۋرستىق كوميسسيا بولمايتىنداي ەتىپ جاسايمىز»، - دەدى اگەنتتىك ءتوراعاسى.