رامازان ايىندا جۇرتشىلىقتىڭ ادال اس ىزدەيتىنى ءمالىم.
الماتى ورتالىق مەشىتىندە قالانىڭ باس يمامى تولەبي ءدادىل ۇلى ءبىرقاتار تاماقتانۋ ورىندارى مەن بالاباقشا مەكەمەسىنە حالال دامۋ سەرتيفيكاتتارىن تابىستادى، دەپ حابارلايدى Almaty-akshamy.kz قمدب باسپا ءسوز قىزمەتىنە سىلتەمە جاساپ.
كۇللى مۇسىلمان اسىعا كۇتكەن رامازان ايىندا جۇرتشىلىقتىڭ ادال اس ىزدەيتىنى ءمالىم. وسىعان وراي ورتالىق مەشىتتە تاراۋيح نامازىنىڭ الدىندا شاھارداعى «كەلينكا» جانە «زاكاز پلوۆا» اتاۋىمەن ءدامدى اس پەن جەتكىزۋ قىزمەتىن ۇسىنىپ وتىرعان تاماقتانۋ ورىندارىنا جاڭادان «QMDB Halal» سەرتيفيكاتىن تابىستادى.
«تۇتىنۋشى تالابىنا ادال قىزمەت ەتۋ مەن كاسىپتەرىڭىزگە بەرەكە تىلەيمىن»، - دەدى باس يمام.
سونىمەن قاتار قالانىڭ باس يمامى تولەبي ءدادىل ۇلى الماتى قالاسىندا تۇڭعىش رەت بوستاندىق اۋدانىنا قاراستى بالاباقشا اسحاناسىنا «QMDB Halal» سەرتيفيكاتىن تابىستادى. مەكتەپكە دەيىنگى بالالاردى تاربيەلەۋ ورتالىعىندا تۇتىناتىن اس ءمازىرى اتا-انالاردى كوپ تولعاندىرعان ماسەلە بولعان. وسىعان وراي مەكەمە باسشىلىعى بۇلدىرشىندەرگە ۇسىناتىن اس ءمازىرىن تولىقتاي حالال ستاندارتتارى نەگىزىنە كوشىرىپ، بۇگىندە «ءان-نيسا» بالاباقشاسىنىڭ اسحاناسى حالال اس ءمازىرىن راستايتىن قۇجات الدى.