جاساندى ينتەللەكتىنى قولدانۋ اياسىن جانە ونى دامىتۋدىڭ مىندەتتەرى مەن قۇرالدارىن ايقىندايتىن ستراتەگيالىق قۇجات قابىلداۋ كەرەك. بۇل تۋرالى «Digital Bridge 2023» حالىقارالىق تەحنولوگيالىق فورۋمىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى اlmaty-akshamy.kz.
«جاساندى ينتەللەكتىنى قولدانۋ اياسىن جانە ونى دامىتۋدىڭ مىندەتتەرى مەن قۇرالدارىن ايقىندايتىن ستراتەگيالىق قۇجات قابىلداۋ كەرەك. بۇل – حالىقارالىق وزىق تاجىريبە. مۇنداي قادام ەلىمىزدى تەحنولوگيالىق تۇرعىدا دامىتۋدىڭ ورنىقتى باعىتىن ايقىنداۋعا مۇمكىندىك بەرەدى. ەڭ الدىمەن، جاساندى ينتەللەكت تەحنولوگياسىن ەكونوميكامىزدىڭ مۇناي-گاز سەكتورى، ەنەرگەتيكا، اۋىل شارۋاشىلىعى، كولىك جانە لوگيستيكا سەكىلدى ماڭىزدى سالالارىنا ەنگىزۋگە ءمان بەرۋىمىز قاجەت دەپ سانايمىن. جاساندى ينتەللەكت قالالارىمىزدى ءومىر سۇرۋگە جانە جۇمىس ىستەۋگە قولايلى ءارى تولىققاندى اقىلدى قالاعا (smart city) اينالدىرۋ پروسەسىن ايتارلىقتاي دارەجەدە وڭتايلاندىرا الادى»، - دەدى پرەزيدەنت.
قاسىم-جومارت توقايەۆ مەملەكەتتىك قىزمەت كورسەتۋ كەزىندە جاساندى ينتەللەكت مۇمكىندىكتەرىن كەڭىنەن پايدالانۋدىڭ دا ماڭىزى زور ەكەندىگىنە نازار اۋدارتتى.
«بۇل ورايدا ءبىز ەلەۋلى ناتيجەگە قول جەتكىزدىك. اتاپ ايتقاندا، ازاماتتاردىڭ الەۋمەتتىك ءال-اۋقاتىنىڭ دەڭگەيىن انىقتاۋعا جانە ولارعا پرواكتيۆتى مەملەكەتتىك قولداۋ كورسەتۋگە مۇمكىندىك بەرەتىن «وتباسىنىڭ سيفرلىق كارتاسى» ىسكە قوسىلدى. مۇنداي ءونىمدى «بايتەرەك» حولدينگى بازاسىندا بيزنەس ءۇشىن دە ەنگىزۋ كەرەك. مەنىڭ تاپسىرمام بويىنشا بۇل باعىتتا اۋقىمدى سيفرلىق ترانسفورماسيالاۋ جۇمىستارى باستالىپ كەتتى»، - دەدى مەملەكەت باسشىسى.