مەملەكەتتىك قىزمەت ىستەرى اگەنتتىگى قايتا قۇرىلادى

ۇكىمەت مۇشەلەرى ىسكە اسىرىلاتىن جوسپارلارى تۋرالى ايتتى.

مەملەكەتتىك قىزمەت ىستەرى اگەنتتىگى تولىققاندى ستراتەگيالىق HR ينستيتۋتى بولىپ قايتا قۇرىلادى. بۇل تۋرالى ق ر ۇلتتىق ەكونوميكا ءمينيسترى الىبەك قۋانتىروۆ ۇكىمەت وتىرىسىندا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«مەملەكەتتىك قىزمەت ىستەرى اگەنتتىگى تولىققاندى ستراتەگيالىق HR ينستيتۋتى بولىپ قايتا قۇرىلادى. «زاڭ جانە ءتارتىپ» بەسىنشى باعىتى بويىنشا 23 ءىس-شارا جوسپارلانعان. زاڭ ۇستەمدىگى مەن سوت تورەلىگىنىڭ ءادىل اتقارىلۋىن قامتاماسىز ەتۋ ءۇشىن زاڭناماعا، ونىڭ ىشىندە سوت ءتوراعالارىن سۋديا لاۋازىمدارىنا وزگەرتىپ، سۋديالاردىڭ تاۋەلدىلىگىن تومەندەتە وتىرىپ، ولاردىڭ تەڭ مارتەبەسىن قامتاماسىز ەتەتىن وزگەرىستەر ەنگىزۋ كوزدەلەدى»، -دەدى ۆەدومستۆو باسشىسى.

سونداي-اق، جولداۋدى ىسكە اسىرۋ اياسىندا ناشاقورلىققا جانە ەسىرتكى بيزنەسىنە قارسى كۇرەس جونىندەگى ستراتەگيالىق باعدارلامالىق قۇجات ازىرلەنەتىنى ايتىلدى.

«ادام ءولتىرۋ، قاراقشىلىق جاساۋ جانە تاعى باسقا اۋىر قىلمىس جاساعاندار ءۇشىن قىلمىستىق جاۋاپكەرشىلىك كۇشەيتىلىپ، شارتتى تۇردە مەرزىمىنەن بۇرىن بوساتۋ دوعارىلادى»، - دەدى ۇلتتىق ەكونوميكا ءمينيسترى.