مەملەكەتتىك كىرىستەر كوميتەتى مەن قحر ءۇرىمشى باسقارماسى باسشىلارى كەزدەستى

2023 جىلعى 21-22 جەلتوقساندا «قورعاس» شەكارا ماڭى ىنتىماقتاستىعى حالىقارالىق ورتالىعىنىڭ اۋماعىندا قازاقستان رەسپۋبليكاسى مەن جۇڭگو حالىق رەسپۋبليكاسىنىڭ شەكارا ماڭى كەدەن ورگاندارى باسشىلارىنىڭ كەزدەسۋى ءوتتى.

تالقىلاۋعا شىعارىلعان باسىم ماسەلەلەردىڭ ءبىرى وتكىزۋ پۋنكتتەرىنىڭ وتكىزۋ قابىلەتىن ارتتىرۋ بولدى. وسى ماسەلە شەڭبەرىندە «نۇر جولى – قورعاس» وتكىزۋ پۋنكتىندەگى تاۋلىك بويعى جۇمىس رەجيمى، سونداي-اق «مايقاپشاعاي-زيمۇناي» جانە «قالجات-دۋلاتى» وتكىزۋ پۋنكتتەرىندەگى 7 كۇندىك 12 ساعاتتىق جۇمىس رەجيمى بويىنشا پيلوتتىق جوبالارعا باعالاۋ جۇرگىزىلدى، دەپ حابارلايدى اlmaty-akshamy.kz. 

تاراپتار وسى وتكىزۋ پۋنكتتەرى ارقىلى تاۋار اعىنىنىڭ وڭ سەرپىنىن اتاپ ءوتىپ، پيلوتتىق جوبالاردى ىسكە اسىرۋدى جالعاستىرۋعا كەلىستى.

بۇگىنگى تاڭدا شەكارانىڭ قازاقستان-قىتاي ۋچاسكەسىندە ورنالاسقان بارلىق اۆتوموبيل وتكىزۋ پۋنكتتەرى 7/12 رەجيمىندە، ال «نۇر جولى» وتكىزۋ پۋنكتى تاۋلىك بويى جۇمىس ىستەيتىنىن اتاپ وتەمىز.

سونىمەن قاتار، كەزدەسۋ بارىسىندا اگروازىق-تۇلىك ونىمدەرى ءۇشىن «جاسىل ءدالىزدى» ىلگەرىلەتۋ جانە قازاقستاندىق جوعارى ساپالى اگروازىق-تۇلىك ونىمدەرىنىڭ قىتايعا قولجەتىمدىلىگىن ىلگەرىلەتۋ بويىنشا ىنتىماقتاستىق ماسەلەلەرى تالقىلاندى.

قازاقستاندىق دەلەگاسيانى قازاقستان رەسپۋبليكاسى قارجى مينيسترلىگى مەملەكەتتىك كىرىستەر كوميتەتىنىڭ باقىلاۋ دەپارتامەنتىنىڭ ديرەكتورى ساۋدابايەۆ ەلدوس باسقاردى.

جۇڭگو دەلەگاسياسىن ءۇرىمشى كەدەن باسقارماسىنىڭ باستىعى حاو ۆايمين باسقاردى.