ەل ەكونوميكاسىنىڭ نەگىزگى سالالارىنىڭ ءبىرى - اۋىل شارۋاشىلىعى جىلدى قالاي قورىتىندىلادى؟

اۋىل شارۋاشىلىعىندا 2023 جىلى قانداي اۋقىمدى ىستەر اتقارىلدى؟

اتالعان سالاعا قاتىستى جۇمىس ناتيجەسىن Primeminister.kz رەداكسياسى ۇسىنعان شولۋعا سۇيەنە وتىرىپ، نازارلارىڭىزعا ۇسىنامىز. 

● وسى جىلدىڭ 11 ايىندا اۋىل شارۋاشىلىعىنىڭ جالپى ءونىمىنىڭ كولەمى 8،2 ترلن تەڭگە بولدى. 16،6 ملن توننا ءداندى داقىلدار، 2،1 ملن توننا مايلى داقىلدار جانە 5 ملن جەم-شوپ داقىلدارى جينالدى. وتكەن جىلدان اۋىسقان قوردى ەسەپتەگەندە، جينالعان ءونىم ىشكى نارىقتى تولىق قامتاماسىز ەتۋگە جەتكىلىكتى.

● قازاقستاننىڭ مال شارۋاشىلىعى سالاسى تۇراقتى ءوسىمدى كورسەتىپ وتىر. وسى جىلدىڭ 11 ايىندا ءونىم ءوندىرۋ كولەمى 3،3%-عا ارتىپ، 3،8 ترلن تەڭگەنى قۇرادى.

● ءىرى قارا مال باسى 2،9%-عا (9 ملن باس)، ۇساق مال باسى 4%-عا (23،6 ملن باس)، جىلقى 8،3%-عا (4 ملن باس)، تۇيە 5،3%-عا (277،6 مىڭ باس)، سونداي-اق قۇس 9،5%-عا (54 ملن باس) ءوستى.

● ازىق-تۇلىك ءوندىرىسىنىڭ كولەمى 1،9%-عا ءوسىپ، 2،9 ترلن تەڭگەنى قۇرادى. اتاپ ايتقاندا، سارى ماي ءوندىرىسى 18،4%-عا (28،7 مىڭ توننا)، ىرىمشىك پەن سۇزبە ءوندىرىسى 9،3%-عا (39،8 مىڭ توننا)، وڭدەلگەن ءسۇت ءوندىرىسى 3%-عا (548،1 مىڭ توننا)، شۇجىق ونىمدەرىنىڭ ءوندىرىسى 1،9%-عا (61،4 مىڭ توننا)، وسىمدىك مايى ءوندىرىسى 1%-عا (609،4 مىڭ توننا) ۇلعايدى.

● الەۋمەتتىك-كاسىپكەرلىك كورپوراسيالار ارقىلى اوك سالاسىنداعى ءىرى ونەركاسىپ جوبالارىن ىسكە اسىرۋ بويىنشا سولتۇستىك قازاقستان وبلىسىنىڭ تاجىريبەسىن باسقا وڭىرلەرگە تاراتۋ ماقساتىندا اۋقىمدى جۇمىس باستالدى.

اتالعان ماقساتتارعا 100 ملرد تەڭگە ءبولىندى، بۇل 65 تاۋارلى ءسۇت فەرماسىنىڭ قۇرىلىسىن قارجىلاندىرۋعا جانە ءسۇت ءوندىرۋ كولەمىن كەمىندە 373 مىڭ تونناعا ۇلعايتۋعا مۇمكىندىك بەرەدى. 2024 جىلى باعدارلامانى ىسكە اسىرۋعا قوسىمشا 100 ملرد تەڭگە باعىتتاۋ جوسپارلانىپ وتىر.