مەملەكەتتىك كىرىستەر كوميتەتى دەكلاراسيانى تاپسىرۋ مەرزىمى جايلى ەسكەرتتى

جالپىعا بىردەي دەكلاراسيالاۋ ەنگىزىلىپ جاتىر.

مەملەكەتتىك كىرىستەر كوميتەتىندە كىرىستەر مەن مۇلكى تۋرالى دەكلاراسيانى تابىس ەتۋ مەرزىمى تۋرالى ەسكەرتتى، دەپ حابارلايدى Almaty-akshamy.kz.

2021 جىلدان باستاپ قازاقستاندا كەزەڭ-كەزەڭىمەن جالپىعا بىردەي دەكلاراسيالاۋ ەنگىزىلىپ جاتىر. ول مەملەكەتتىك قىزمەتشىلەردەن، ولارعا تەڭەستىرىلگەن تۇلعالاردان، سونداي-اق ولاردىڭ جۇبايلارىنان باستالادى.

مەملەكەتتىك كىرىستەر كوميتەتى كىرىستەر مەن مۇلكى تۋرالى دەكلاراسيانى تابىس ەتۋ مەرزىمى تۋرالى ەسكەرتتى.

2022 جىلعى 15 قىركۇيەك – كىرىستەرى مەن مۇلكى تۋرالى دەكلاراسيانى (270.00-نىسان) ەلەكتروندىق تۇردە تاپسىرۋ مەرزىمى.

دەكلاراسيا قاعاز تۇرىندە تاپسىرىلاتىن بولسا، 2022 جىلعى 15 شىلدەدەن كەشىكتىرىلمەي تابىس ەتىلۋى ءتيىس. 2022 جىلى كىرىستەر مەن مۇلىك تۋرالى دەكلاراسيانى جالپىعا بىردەي دەكلاراسيالاۋدىڭ ءبىرىنشى كەزەڭىنىڭ تۇلعالارى ۇسىنادى، ولار 2021 جىلى اكتيۆتەر مەن مىندەتتەمەلەر تۋرالى دەكلاراسيانى (250.00-نىسان) ۇسىنعان بولاتىن.

دەكلاراسيانى «سالىق تولەۋشىنىڭ كابينەتى» (kgd.gov.kz) web-قوسىمشاسى جانە «e-Salyq Azamat» ءموبيلدى قوسىمشاسى ارقىلى ەلەكتروندى تۇردە تولتىرىپ، تاپسىرۋعا بولادى.

جەكە تۇلعالار دەكلاراسيانى تۇرعىلىقتى جەرى بويىنشا، ال دارا كاسىپكەرلەر مەن جەكە پراكتيكامەن اينالىساتىن ادامدار ورنالاسقان جەرى بويىنشا تابىس ەتەدى.