جاھان جۇرتى دامۋدىڭ جاڭا جولىن ىزدەپ، تىڭ تاجىريبەلەرگە بەت بۇرۋدا. وسىنداي الماعايىپ كەزەڭدە ەلدىكتىڭ ەڭسەسىن تىكتەۋ قاسىم-جومارت توقايەۆتىڭ باعىنا بۇيىرىپ، مەملەكەت باسشىسى پەرزەنتتىك پارىزىن، ازاماتتىق مىندەتىن مەيلىنشە ادال ورىنداپ جۇرگەنىن كورىپ، ءبىلىپ ءجۇرمىز.
حالىققا جولداعان ءار جولداۋىندا قوعامداعى قاداۋ-قاداۋ ماسەلەلەردى شەشۋدىڭ جولىن كورسەتىپ، ساياسي رەفورمالاردىڭ نەگىزگى باعىتىن بايىپتايتىن. قىركۇيەك ايىنداعى جولداۋىنىڭ جۇگى ءتىپتى اۋىر بولدى. ويتكەنى باستاعان ساياسي رەفورمالارىن سوڭىنا جەتكىزۋدە پرەزيدەنتتىك سايلاۋ وتكىزىپ، ودان كەيىن ءماجىلىس جانە ءماسليحات دەپۋتاتتارىن ساياسي دوداعا ءتۇسىرىپ، سوسىن ۇكىمەتتى جاڭادان جاساقتايتىنىن مالىمدەدى.
جاقىندا پرەزيدەنت ەلگە ارنايى ۇندەۋ جاساپ، كەزەكتەن تىس سايلاۋ 20 قاراشادا وتەتىنى تۋرالى جارلىققا قول قويدى. بۇل سايلاۋ ەلىمىزدىڭ بۇكىل ساياسي جۇيەسىن قايتا جاڭعىرتۋعا دەم بەرىپ، مەملەكەتتىك ينستيتۋتتاردىڭ جۇمىس ىستەۋىنە قارقىن بەرەدى دەپ ويلايمىن.
مەملەكەتتىك ساياسي جۇيە ەكپىنى ەسەلەنە ءتۇسىپ، بويىنا قان جۇگىرەرى ءسوزسىز. جۇرگىزىلگەن كونستيتۋسيالىق رەفورما ارقىلى ءبىز تۇعىرى بيىك ساياسي مودەلدىڭ ەل يگىلىگى جولىنداعى ماقساتتارىمىزدى ايقىنداپ الدىق.
سايلاۋ – ساياسي باعىتىمىزدى نىعايتۋعا جانە مەملەكەتتىك جۇيەنى تولىعىمەن جاڭارتىپ، قايتا ىسكە قوسۋىنا جول اشادى دەپ ەسەپتەيمىن.