پارلامەنت پالاتالارىنىڭ بىرلەسكەن وتىرىسىندا پرەزيدەنت قاسىم-جومارت توقايەۆ مەملەكەتتىك اپپاراتتى بيۋروكراتيادان ارىلتۋ جۇمىسى جالعاسا بەرەتىنىن ايتتى، دەپ حابارلايدى Almaty-akshamy.kz.
«پرەزيدەنت اكىمشىلىگى باستى «ساياسي شتاب» رەتىندە مەملەكەتتى الەۋمەتتىك-ەكونوميكالىق دامىتۋدىڭ ستراتەگيالىق باعىتتارىنا، ىشكى جانە سىرتقى ساياسات، قورعانىس جانە قاۋىپسىزدىك، قۇقىق جانە كادر ساياساتى ماسەلەلەرىنە بارلىق كۇش-جىگەرىن جۇمىلدىرادى. مەملەكەتتىك اپپاراتتى بيۋروكراتيادان ارىلتۋ جولىنداعى جۇيەلى جۇمىس جالعاسا بەرەدى. مەملەكەتتىك جوسپارلاۋ جۇيەسىن تۇبەگەيلى وزگەرتۋ قاجەت. بىزگە ونىڭ مەيلىنشە شاعىن جانە قولايلى بولعانى ماڭىزدى»، - دەدى مەملەكەت باسشىسى.
پرەزيدەنت تاپسىرمالاردىڭ ورىندالۋىن باقىلاۋ جانە باعالاۋ جۇمىسىن دا قايتا قاراۋ قاجەتتىگىن باسا ايتتى.
«ءقازىر قوعامدا جاڭا ادىس-تاسىلدەرگە، جاڭا يدەيالارعا، جاڭا كادرلارعا دەگەن سۇرانىس اسا جوعارى. سوندىقتان ساياسي مەملەكەتتىك قىزمەتشىلەردىڭ رەزەرۆى قۇرىلادى، سونىڭ ارقاسىندا «قوسىمشا كادرلار توبى» قالىپتاسادى. ءقازىر كادر تاپشىلىعى وزەكتى ماسەلە بولىپ تۇرعان كەزدە مۇنداي قادام وتە ماڭىزدى. جوعارى لاۋازىمعا يە بولعىسى كەلەتىندەر كوپ، ءبىراق ولاردىڭ بىلىكتىلىگى ءتيىستى تالاپقا ساي كەلمەيدى. دەمەك، كادر ماسەلەسىن مىندەتتى تۇردە قولعا الۋىمىز كەرەك، ساپالى ماماندار تاربيەلەۋ قاجەت. بۇل رەتتە ساياسي پارتيالاردىڭ كادرلىق الەۋەتىن دە پايدالانعان ءجون. ايماقتاعى اتقارۋشى بيلىكتىڭ شەشىم قابىلداۋ ىسىنە ازاماتتاردىڭ تىكەلەي قاتىسۋ مۇمكىندىگىن بىرتىندەپ ارتتىرۋ دا ماڭىزدى. اۋىل، كەنت جانە اۋىلدىق وكرۋگ اكىمدەرىن تۇرعىندار وزدەرى سايلاي باستاعانىنا ەكى جىلدان استى. سودان بەرى اۋىلدىق دەڭگەيدەگى اكىمدەردىڭ تورتتەن ءۇشى سايلاندى. ەندى اۋدان جانە وبلىستىق دەڭگەيدەگى قالا اكىمدەرىن سايلاپ كورەمىز»، - دەدى قاسىم-جومارت توقايەۆ.