2029 جىلعا قاراي ۇلتتىق ەكونوميكانىڭ كولەمىن 450 ميلليارد دوللارعا دەيىن ەكى ەسە ۇلعايتۋ ماقساتى قويىلدى. بۇل تۋرالى پرەزيدەنت قاسىم-جومارت توقايەۆ پارلامەنت پالاتالارىنىڭ بىرلەسكەن وتىرىسىندا قازاقستان حالقىنا جولداۋىندا ايتتى، دەپ حابارلايدى Almaty-akshamy.kz.
«ەلىمىزدىڭ ەكونوميكاسىن دامىتۋعا قاتىستى بۇگىن ايتىلعان جوبا-جوسپاردىڭ ءبارى ناقتى زەرتتەلىپ، ەسەپتەلىپ جاسالدى. بۇكىل ەكونوميكالىق جۇيەنى شۇعىل تۇردە تۇبەگەيلى قايتا قاراپ، وزگەرتۋ ارقىلى ەلىمىزدى وركەندەتەمىز، حالىقتىڭ ءال-اۋقاتىن ارتتىرامىز. رەفورمانىڭ باستى ماقساتى – ەكونوميكامىزدىڭ تۇراقتى ءوسىمىن 6-7 پايىزعا جەتكىزۋ جانە 2029 جىلعا قاراي ۇلتتىق ەكونوميكانىڭ كولەمىن 2 ەسەگە ۇلعايتۋ، ياعني 450 ميلليارد دوللارعا جەتكىزۋ»، - دەدى قاسىم-جومارت توقايەۆ.
پرەزيدەنت مۇنىڭ اۋقىمدى ءارى كۇردەلى مىندەت ەكەنىن اتاپ ءوتتى.
«ءبىراق ءبىز ەلىمىزدىڭ بايلىعىن، تابىسىن ازاماتتارىمىزدىڭ اراسىندا ءادىل ءبولۋىمىز قاجەت. ءبىر سوزبەن ايتقاندا، ەكونوميكالىق ءوسىمنىڭ يگىلىگىن ءاربىر ازاماتىمىز كورۋى كەرەك. بۇل – ءپرينسيپتى ماسەلە. ەلىمىزدىڭ بولاشاعى باياندى بولسىن دەسەك، بۇل ستراتەگيالىق مىندەتتى قالايدا ورىنداۋعا ءتيىسپىز. مەن ەلىمىزدىڭ دامۋ باعدارى تۋرالى پايىمدارىمدى ۇنەمى ايتىپ ءجۇرمىن. سونى تاعى دا قايتالاعىم كەلەدى. ءبىز بولاشاقتا قانداي ەل بولاتىنىمىزدى ناقتى بىلەمىز. بارىنە بىردەي مۇمكىندىك بەرەتىن وركەنيەتتى ەل – ادىلەتتى قازاقستاندى قۇرامىز»، - دەدى مەملەكەت باسشىسى.