قازاقستان رەسپۋبليكاسىنىڭ مەملەكەتتىك حاتشىسى ەرلان قارين ەۋروپا وداعىنا مۇشە مەملەكەتتەردىڭ ەلىمىزدە اككرەديتتەلگەن ديپلوماتيالىق وكىلدىكتەرىنىڭ باسشىلارىمەن كەزدەستى، دەپ حابارلايدى اlmaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
مەملەكەتتىك حاتشى ديپلوماتتارعا قاسىم-جومارت توقايەۆتىڭ ساياسي رەفورمالارىنىڭ ءمان-ماڭىزى تۋرالى ايتىپ، پرەزيدەنتتىڭ جاقىندا قازاقستان حالقىنا ارناعان «جاڭا قازاقستان: جاڭارۋ مەن جاڭعىرۋ جولى» اتتى جولداۋىنىڭ نەگىزگى قاعيدالارىنا توقتالدى.
ەلىمىزدىڭ سۋپەرپرەزيدەنتتىك جۇيەدەن مىقتى پارلامەنتى بار پرەزيدەنتتىك رەسپۋبليكاعا كوشۋ تەتىكتەرىنە، سونىڭ ىشىندە، ءماجىلىستى قالىپتاستىرۋدىڭ پروپورسيونالدى-ماجوريتارلىق جۇيەسىنە، پالاتالاردىڭ وكىلەتتىكتەرىن كەڭەيتۋ، ساياسي پارتيالاردى تىركەۋ ءتارتىبىن ىرىقتاندىرۋ، جەرگىلىكتى ءوزىن-وزى باسقارۋ ينستيتۋتتارىن جەتىلدىرۋ، مەملەكەتتىڭ اكىمشىلىك-اۋماقتىق قۇرىلىمىن رەفورمالاۋ، زاڭ ۇستەمدىگى قاعيداتتارىن نىعايتۋ ماسەلەلەرىنە ەرەكشە كوڭىل ءبولىندى.
ەرلان قارين شەتەلدىك ديپلوماتتاردىڭ جاڭا رەفورمالارعا قاتىستى ءبىرقاتار سۇراعىنا جاۋاپ بەردى.
كەزدەسۋگە قاتىسۋشىلار قازاقستان مەن ەۋروپا وداعى اراسىنداعى سەرىكتەستىكتىڭ ورتاق باعىتتارىن تالقىلادى، سونداي-اق، ايماقتاعى كەڭ اۋقىمدى ماسەلەلەر جونىندە پىكىر الماستى.