مەملەكەتتىك ءبىلىم گرانتتارى كىمدەرگە بەرىلەدى؟

جالپى، اۋىلدىق، الەۋمەتتىك وسال توپقا ارنالعان جانە قانداستار كۆوتاسى سياقتى نەگىزگى 9 كۆوتا بار.

بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويبايەۆ وقۋعا تۇسۋگە ارنالعان جەڭىلدىكتەر، كۆوتالار تۋرالى ايتتى، دەپ حابارلايدى Almaty-akshamy.kz Elorda.info-عا سىلتەمە جاساپ. 

"كوپ بالالى وتباسىلاردان شىققان بالالارعا 5% كۆوتا، تولىق ەمەس وتباسىلارعا 1%، بالا كەزىنەن مۇگەدەك بالانى تاربيەلەپ وتىرعان وتباسىلاردان شىققان بالالار ءۇشىن 1% كۆوتا، قانداستارعا ارنالعان 4%، جەتىم بالالارعا ارنالعان 1%، ەكىنشى دۇنيەجۇزىلىك سوعىس قاتىسۋشىلارى مەن مۇگەدەكتەرىنە تەڭەستىرىلگەن ادامدار ءۇشىن 0،5%، اۋىل جاستارىنا 30%، «سەرپىن» باعدارلاماسى بويىنشا 10% كۆوتا جانە مۇگەدەك بالالار ءۇشىن 1% كۆوتا بار. بۇل كۆوتالار بويىنشا وزگەرىستەر جوق. ادەتتەگىدەي بۇل توپتاردان شىققان بالالار ءۇشىن گرانتتار بەرىلەدى. مۇگەدەك جانە جەتىم بالالارعا كەلسەك، بىلتىر دا، بۇرناعى جىلى دا وسى توپتان شىققان بالالار گرانتپەن قامتىلدى. بيىل دا وسى باعىتتاعى جۇمىس جالعاسادى"، - دەدى بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويبايەۆ.