سەگىز ساياباقتا جاڭارتۋ جۇمىستارى جۇرگىزىلىپ جاتىر.
الماتىنىڭ شەتىندە التى ساياباق سالىنادى، دەپ حابارلايدى Almaty-akshamy.kz.
جاڭا سالىناتىن ساياباقتاردىڭ باسىم بولىگى الاتاۋ اۋدانىندا ("زەردەلى"، "بورالداي"، "سايالى"، "وجەت" شاعىناۋداندارى)، سونداي-اق مەدەۋ ("الاتاۋ" ش/ا) جانە ناۋرىزباي اۋداندارىندا (قارعالى جاعالاۋىنىڭ بويىندا) بولادى. بۇل ساياباقتار بالالار جانە سپورت الاڭدارىمەن، رەكرەاسيالىق ايماقتارمەن جابدىقتالادى.
بۇگىندە قالادا جالپى الاڭى 631،2 گا بولاتىن 211 ساياباق اۋماعى ورنالاسقان. قازىرگى ۋاقىتتا سەگىز نىساندى، ونىڭ ىشىندە ساياباقتاردى، سكۆەرلەردى جانە ت.ب. اباتتاندىرۋ، جوندەۋ جانە قايتا جاڭارتۋ جۇمىستارى جۇرگىزىلۋدە.
نىسانداردىڭ ءبىرى – قبتۋ عيماراتىنىڭ ارتىنداعى «سيەۆەرنىي» سكۆەرى. وندا باستاپقىدا تەك سۋبۇرقاقتى رەكونسترۋكسيالاۋ جوسپارلانعان بولاتىن. الايدا، تەكسەرۋ بارىسىندا بۇكىل الاڭنىڭ توزعانى انىقتالدى. ناتيجەسىندە بۇكىل اۋماقتى قايتا قۇرۋ تۋرالى شەشىم قابىلداندى. جوبا بويىنشا اعاشتاردى سانيتارلىق كەسۋ، كوگالداندىرۋ، برۋسچاتكانى جاڭارتۋ، سىرتقى جارىقتاندىرۋ، سونداي-اق قالا تۇرعىندارى مەن قوناقتارىنىڭ قاۋىپسىزدىگى ءۇشىن بەينەكامەرالار ورناتۋ قاراستىرىلعان. بارلىق جۇمىستاردى 2022 جىلدىڭ قازان ايىندا اياقتاۋ جوسپارلانۋدا.
بايسەيىتوۆا كوشەسى بويىمەن ساتپايەۆ كوشەسىنەن جامبىل كوشەسىنە دەيىنگى جاياۋ جۇرگىنشىلەر ايماعى سپورت، بالالار الاڭدارىمەن، ورىندىقتارمەن، قوقىس جاشىكتەرىمەن جابدىقتالادى، سىرتقى جارىقتاندىرۋدى ورناتۋ جوسپارلانۋدا. قازىرگى ۋاقىتتا مەردىگەرلىك ۇيىمنىڭ بۇزۋشىلىقتارىنا بايلانىستى جۇمىستار ۋاقىتشا توقتاتىلدى. كومپانيا ماماندارى جۇمىس بارىسىندا 10-عا جۋىق اعاشتىڭ تامىر جۇيەسىنە زاقىم كەلتىرگەن. جاقىن ارادا وسى ۋچاسكەدەگى پروبلەمالىق ماسەلەلەردى تالقىلاۋ ءۇشىن جۇرتشىلىقپەن كەزدەسۋ وتكىزۋ جوسپارلانۋدا.
وتكەن جىلى بوستاندىق اۋدانىندا جالپى اۋماعى 3،4 گا بولاتىن «دوستىق» ساياباعىن اباتتاندىرۋ جانە كوگالداندىرۋ جۇمىستارى جۇرگىزىلدى. قايتا قۇرۋ اياسىندا اسفالت جابىندارى جاڭارتىلدى، ورىندىقتار مەن قوقىس جاشىكتەرى ورناتىلدى، سىرتقى جارىقتاندىرۋ جانە سۋارۋ جۇيەسى جۇرگىزىلدى، workout جانە بالالار ويىن الاڭى سالىندى.
قالا ورتالىعىنان الىس ورنالاسقان ءاربىر اۋداندا سەرۋەندەيتىن ايماقتار سالۋ جوسپارلانۋدا. مىسالى، بورالدايداعى ساياباق تەررەنكۋرعا ۇقساس بولادى، ال زەردەلىدە ورتالىق مادەنيەت ساياباعىنا ۇقساس جاستار ساياباعى سالىنادى.
قازىرگى ۋاقىتتا قالانىڭ ساياباقتارى مەن گۇلزارلارىن كۇتىپ ۇستاۋدا پروبلەمالار بار. وسى ماسەلەنى شەشۋ ءۇشىن قالانىڭ ساياباقتارى مەن گۇلزارلارىن كۇتىپ ۇستاۋ جانە ولارعا قىزمەت كورسەتۋ جونىندەگى جۇمىستاردىڭ ءتيىستى ساپاسىن جانە باقىلاۋدى قامتاماسىز ەتەتىن ءبىرىڭعاي وپەراتور – "Eco Almaty" ج ش س بەرۋ تۋرالى ۇسىنىس ەنگىزىلدى.
ەسكە سالساق، بۇعان دەيىن الماتى اكىمى ەربولات دوسايەۆ «جەلتوقسان» ساياباعىن اباتتاندىرۋ جۇمىستارىنىڭ بارىسىن تەكسەرگەن بولاتىن. تەكسەرۋ بارىسىندا قالا اكىمى تروتۋار پليتكالارىن توسەۋ ساپاسىن سىنعا العان ەدى، مۇندا بارلىق جاياۋ جۇرگىنشىلەر جولىنا توسەلگەن تاستار باسىلىپ كەتكەن ءارى جارىقتار، چيپتەر پايدا بولعان. قالا باسشىسى اعاش ورىندىق كەشەندەرىنىڭ بەتىن وڭدەۋ تەحنولوگياسىنا قاتىستى ەسكەرتۋ جاسادى – ويتكەنى ورىندىق كەشەندەرىنىڭ بوياۋى بۇكىل نىسان پايدالانۋعا بەرگەنگە دەيىن ءتۇسىپ، ەسكىرىپ كەتەدى.
رەكونسترۋكسيالاناتىن جانە اباتتاندىرىلاتىن وبەكتىلەردىڭ تولىق ءتىزىمى:
- «جەلتوقسان» ساياباعى تۇركسىب اۋدانىنداعى "ماياك" شاعىناۋدانى؛
- ەسەنتاي وزەنىنىڭ جاعالاۋى، جەتىسۋ اۋدانىنداعى "كوكمايسا" شاعىناۋدانى؛
- مەدەۋ اۋدانىنداعى وقۋشىلار سارايىنىڭ جانىنداعى سكۆەر؛
- المالى اۋدانىنداعى قبتۋ ارتىنداعى «سيەۆەرنىي» سكۆەرى؛
- بايسەيىتوۆا كوشەسى بويىنداعى جاياۋ جۇرگىنشىلەر ايماعى ساتپايەۆ كوشەسىنەن جامبىل كوشەسىنە دەيىن؛
- «الماتى زوولوگيالىق پاركى» كمقك اۋماعىندا تازارتۋ قۇرىلىستارىن پايدالانا وتىرىپ، توعانداردى اباتتاندىرۋ؛
- مەدەۋ اۋدانىنداعى سۋ بولگىشتەن جاماقايەۆ كوشەسىنە دەيىنگى ەسەنتاي وزەنىنىڭ سۋ قورعاۋ بەلدەۋى مەن ارناسى؛
- جاربۇلاق وزەنىنىڭ ارناسىن رەكونسترۋكسيالاۋ؛
- بايسەيىتوۆا كوشەسىندەگى جاياۋ جۇرگىنشىلەر ايماعى؛
- «سيەۆەرنىي» سكۆەرى.
