مەملەكەتكە قايتارىلعان جەر ۋچاسكەلەرى بولاشاقتا اۋكسيونعا شىعارىلادى

مۇنداي قادام  ينۆەستيسيا تارتۋ ءۇشىن جاسالماق.

بۇل تۋرالى بۇگىن ۇكىمەت وتىرىسىندا ق ر ەنەرگەتيكا ءمينيسترى بولات اقشولاقوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«جەر قويناۋىن يگەرۋ جانە وسى سالاعا ينۆەستيسيا تارتۋ بويىنشا بەلسەندى جۇمىس ءجۇرىپ جاتىر. بۇگىنگى تاڭدا كومىرسۋتەكتەر مەن ۋراندى بارلاۋعا جانە وندىرۋگە ارنالعان 304 كەلىسىمشارت بار. 2022 جىلى جەر قويناۋىن پايدالانۋعا سالىنعان ينۆەستيسيا سوماسى 5،9 ترلن تەڭگەنى قۇرادى. وتكەن جىلى اۋكسيوندا 39 ملرد تەڭگە قول قويۋ بونۋسى تولەنىپ، 49 جەر قويناۋى ۋچاسكەسى بەرىلدى. گەولوگيالىق بارلاۋعا مالىمدەلگەن ينۆەستيسيا سوماسى شامامەن 56 ملرد تەڭگە بولدى»، - دەدى بولات اقشولاقوۆ.

ونىڭ اتاپ وتۋىنشە، جەر قويناۋىن پايدالانۋشىلار العان كەلىسىمشارتتىق مىندەتتەمەلەردى ورىنداماي ۇزاق ۋاقىت ۇستايتىن جەر قويناۋى ۋچاسكەلەرىن تەكسەرۋ بويىنشا جۇمىس جالعاسىپ جاتىر.

«مۇناي-گاز سالاسىندا جۇيەلى بۇزۋشىلىقتارى بار 27 كەلىسىمشارتتىڭ 12ء-سى بۇزىلدى. 9 كەلىسىمشارت بويىنشا 1،5 ملرد تەڭگە سوماعا بەرەشەك وتەلدى، 4 كەلىسىمشارت بويىنشا سوت تالاپ-ارىزدارى جىبەرىلدى. ەكى كەلىسىمشارت بويىنشا جۇمىس زاڭناماعا سايكەس جالعاسۋدا. مەملەكەتكە قايتارىلعان جەر قويناۋىنىڭ ۋچاسكەلەرى بولاشاقتا ينۆەستيسيا تارتۋ ءۇشىن اۋكسيونعا شىعارىلادى»، - دەدى ول.