الماتىلىق دانيار بۋكسۋكبايەۆ «بيزنەستىڭ جول كارتاسى–2025» باعدارلاماسى شەڭبەرىندە كوسمەتيكا ءوندىرىسى بويىنشا 5 ملن. تەڭگە كولەمىندە يننوۆاسيالىق گرانت ۇتىپ الدى. وعان گرانت العانعا دەيىن «Qoldaý» كاسىپكەرلىك ورتالىعى قولداۋ كورسەتكەن بولاتىن.
دانياردىڭ بۇل سالادا جۇمىس ىستەپ جاتقانىنا 5 جىل. ءيا، كوپ ۋاقىت ەمەس. ءبىراق العا جىلجۋ بار. شىنى كەرەك، ءقازىر سورەلەردە شەت ەلدىڭ كوسمەتيكالىق ونىمدەرى سامساپ تۇر. ءتىپتى، قايسىسى پايدالى، ال قايسىسى زيان ەكەنىن ءبىلىپ، ايىرىپ جاتپايمىز دا.
– كەلىنشەگىم بوسانعاننان كەيىن دە بەتىندەگى داقتاردان ارىلا المادى. ول ءتۇرلى كوسمەتيكالىق جاقپامايلاردى ساتىپ الىپ پايدالانا باستادى. ءبىراق ەشقايسىسى كومەكتەسپەدى. ءتىپتى، كەيبىر كوسمەتيكالىق زاتتار اللەرگيالىق رەاكسيا بەردى. ويتكەنى، كوبىنىڭ قۇرامىندا حيميالىق قوسپالار كوپ، – دەيدى ول.
ءسويتىپ، زايىبى وكسانامەن بىرگە كرەم جاساپ كورسەك قايتەدى دەگەن شەشىمگە كەلىپ، ءوز بەتتەرىنشە ىزدەنىپ، ناتيجەسىندە ءوز ۇيىندە كرەم جاساپ شىعارىپ، ءۇش ايدىڭ ىشىندە بەتتەگى پيگمەنتاسيانى كەتىرگەن. بۇل تۋرالى قۇلاعدار بولعان جاقىن-جۋىقتارى مەن دوستارى «سيقىرلى» كرەم تۋرالى ەستىپ، تاپسىرىس بەرە باستايدى. ءسويتىپ، ەرلى-زايىپتى وزگەشە كاسىپتى، ياعني ساپالى كوسمەتيكا شىعارۋدى قولعا الادى. شاعىن عانا LORIEN تاريحى وسىلاي باستاۋ العان بولاتىن.
ءيا، ءقازىر ولاردىڭ شاش، بەت جانە دەنە تەرىسىنە كۇتىم جاساۋعا ارنالعان جوعارى ساپالى كوسمەتيكالار شىعاراتىن ءوز ءوندىرىسى بار. ونىمدەرى «پارفيۋمەرلىك-كوسمەتيكالىق ءونىمنىڭ قاۋىپسىزدىگى تۋرالى» كو تر 009/2011 تالاپتارىنا سايكەس زەرتحانادا جۇرگىزىلەدى.
– ونىمدەردىڭ قۇرامى رەسەي مەن ەۋروپانىڭ كوسمەتيكالىق حيميا سالاسىنداعى ەڭ مىقتى ماماندارىنىڭ كومەگىمەن جاسالادى. ءونىمدى ازىرلەۋدە ءبىز بەت پەن دەنەنىڭ، سونداي-اق شاشتىڭ تەرىسىندەگى پروبلەمالاردى شەشۋگە تەك عىلىمي ءتاسىلدى قولدانامىز. اسسورتيمەنت ءالى ۇلكەن بولماسا دا، ءبىزدىڭ ءار ءونىمىمىز - عىلىم مەن ونەردىڭ ەرەكشە تۋىندىسى. تەك اقش پەن جاپونيادا انالوگتارى بار، الەمدەگى پيگمەنتاسياعا قارسى كۇرەس بويىنشا ەڭ ءتيىمدى قۇرالداردىڭ ءبىرى بولىپ تابىلاتىن ترانەكسام قىشقىلى قوسىلعان اعارتقىش كرەمىمىزدىڭ ءوزى ءبىزدىڭ ماقتانىشىمىز، – دەيدى دانيار بۋكسۋكبايەۆ.
بۇگىنگى تاڭدا LORIEN اسسورتيمەنتىندە ءونىمنىڭ 22 اتاۋى بار، ولار كرەمدەر، بالزامدار، سارىسۋلار، تونيكتەر، سكرابتار، جۋىنۋعا ارنالعان كوبىكتەر، ماسكالار جانە يننوۆاسيالىق سۇر شاشقا تۋعان ءتۇسىن قايتاراتىن شاش لوسونى. دانيارعا مەملەكەتتەن قولداۋ تاۋىپ، ارنايى گرانت جەڭىپ الۋىنا دا ءدال وسى لوسون مۇرىندىق بولعان بولاتىن.