قازاقستان رەسپۋبليكاسىنىڭ وقۋ-اعارتۋ مينيسترلىگىمەن 2023 جىلى «ءبىرتۇتاس تاربيە» باعدارلاماسى ازىرلەندى.
ورتالىق كوممۋنيكاسيالار قىزمەتىندە وتكەن دوڭگەلەك ۇستەل بارىسىندا وقۋ-اعارتۋ ۆيسە-مينيسترى ەدىل وسپان باعدارلامانى جۇزەگە اسىرۋ بارىسى تۋرالى ايتتى، دەپ حابارلايدى aqshamnews.kz.
مەملەكەت باسشىسىنىڭ تاپسىرماسىنا سايكەس 2024 جىلى باعدارلاما «ادىلەتتى قازاقستان – ادال ازامات – وزىق ويلى ۇلت» جالپىۇلتتىق قۇندىلىقتارعا سايكەس جاڭارتىلىپ، بارلىق ءبىلىم بەرۋ ۇيىمدارىنا ەنگىزىلدى. بيىلعى جىلدىڭ 14 ناۋرىزىندا وتكەن IV ۇلتتىق قۇرىلتايدا پرەزيدەنت قۇرىلتاي مۇشەلەرىنىڭ باعدارلاما اتاۋىن «ادال ازامات» ەتىپ وزگەرتۋ تۋرالى ۇسىنىستارىن قولدادى. بۇل اتاۋ باعدارلامانىڭ قوعامنىڭ تىرەگى بولار ادال، ءادىل جانە جاۋاپكەرشىلىگى جوعارى ازاماتتاردى تاربيەلەۋ جونىندەگى نەگىزگى ماقساتىن ايقىندايدى.
باعدارلامانى ىسكە اسىرۋدىڭ ەكى جىلى ىشىندە ءبىلىم بەرۋ ۇيىمدارىندا التى نەگىزگى باعىت پەن 77 قادامدى قامتيتىن ءبىلىم بەرۋدىڭ ءبىرىڭعاي ەكوجۇيەسىن قۇرۋعا، سونىمەن قاتار سىنىپ جەتەكشىلەرىن، اتا-انالاردى، پسيحولوگيالىق قىزمەتتەردى قوسا العاندا، قاتىسۋشىلاردىڭ كەڭ اۋقىمىن تارتۋعا قول جەتكىزىلدى.
«قۇندىلىقتاردى بالا بويىنا ءسىڭىرۋ ولاردىڭ جاس ەرەكشەلىكتەرىنە سايكەس تانىمدىق، پراكتيكالىق جانە ەموسيونالدى كومپونەنتتەردى قامتۋ ارقىلى جۇرگىزىلەدى. تانىمدىق كومپونەنت ءاربىر قۇندىلىقتىڭ ءمانى مەن مازمۇنىن ۇعىنۋعا، پراكتيكالىق – ولاردى ءىس جۇزىندە ناقتى ارەكەتتەر ارقىلى ىسكە اسىرۋىنا كومەكتەسەدى، ال ەموسيونالدى – بۇل قۇندىلىقتاردى ومىرلىك ادەتكە، كۇندەلىكتى داعدىعا اينالدىرادى»، – دەپ اتاپ ءوتتى وقۋ-اعارتۋ ۆيسە-مينيسترى ەدىل وسپان.
باعدارلاما اياسىندا مەكتەپتەردە اتا-انالاردى پەداگوگيكالىق قولداۋ ورتالىقتارى، سونداي-اق وڭىرلەردە پسيحولوگيالىق قولداۋ ورتالىقتارى اشىلىپ، قىزمەت كورسەتۋدە. باسىم باعىت رەتىندە – وسكەلەڭ ۇرپاقتىڭ باستى تالىمگەرلەرى مەن تاربيەشىلەرى بولىپ تابىلاتىن سىنىپ جەتەكشىلەرىنىڭ ءرولى كۇشەيتىلۋدە.
سونىمەن قاتار جالپىۇلتتىق قۇندىلىقتار وقۋ پروسەسىنە ينتەگراسيالانعان. ول ءپان مازمۇنىندا، سىنىپ ساعاتتارىندا، سىنىپتان تىس ءىس-شارالاردا كورىنىس تاۋىپ، ءبىلىم بەرۋدىڭ بارلىق دەڭگەيلەرىندە جاۋاپتى، ەڭبەكقور جانە ادال ازامات تاربيەلەۋگە مۇمكىندىك بەرەدى.