مەملەكەت باسشىسىنىڭ تاپسىرماسىنا سايكەس «ادال ازامات» ءبىرتۇتاس تاربيە باعدارلاماسى مەنشىك تۇرىنە قاراماستان، بارلىق ءبىلىم بەرۋ ۇيىمدارىنا ەنگىزىلەدى.
ول تۋرالى بۇگىن ورتالىق كوممۋنيكاسيالار قىزمەتىندە وتكەن دوڭگەلەك ۇستەلدە وقۋ-اعارتۋ ۆيسە-مينيسترى ەدىل وسپان ايتتى، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.
باعدارلامانى دامىتۋ بىرنەشە كەزەڭدى قامتيدى. 2025 جىلى باعدارلاما اياسىندا بارلىق قاتىسۋشىلاردى تارتىپ، جەكەمەنشىك مەكتەپتەرمەن جۇمىس كۇشەيتىلەدى. 2026 جىلى باعدارلامانى قوعامعا كەڭىنەن تاراتۋ ءۇشىن پارمەندى شارالار قابىلداناتىن بولادى. سونداي-اق «ادال ازامات» تۇجىرىمداماسىنىڭ قۇندىلىقتارىن ەسكەرە وتىرىپ، مەكتەپتەردىڭ ءبىرىڭعاي ديزاين-كودى ازىرلەنەدى.
«بۇگىندە بارلىق مەملەكەتتىك ءبىلىم بەرۋ ۇيىمدارىندا ءبىرتۇتاس ءبىلىم بەرۋ باعدارلاماسى ءساتتى جۇزەگە اسىرىلۋدا. IV ۇلتتىق قۇرىلتايدا مەملەكەت باسشىسى بۇل باستامانىڭ جالپىۇلتتىق سيپات الۋى كەرەكتىگىن ايتتى. وسىعان بايلانىستى ءبىز جەكە ءبىلىم بەرۋ ۇيىمدارىندا تاربيە باعدارلاماسىن ەنگىزۋ جۇمىسىن جالعاستىرامىز. «ادال ازامات» ءبىرتۇتاس تاربيە باعدارلاماسى بارلىق بالالاردى قامتيتىن جانە جالپىۇلتتىق سيپاتتاعى، ستراتەگيالىق ءمانى بار ۇزاق مەرزىمدى قۇجات»، – دەدى ەدىل وسپان.
«ادال ازامات» ءبىرتۇتاس تاربيە باعدارلاماسى تەك قانا ءبىلىم بەرۋ ۇيىمدارىنداعى عانا ەمەس، بارلىق مەملەكەتتىك ۇيىمدارداعى تاربيە جۇمىسىنا قاتىستى ءىس-قيمىلدىڭ نەگىزىنە اينالادى. وقۋ-اعارتۋ مينيسترلىگى ءبىلىم بەرۋ ۇيىمدارىندا مەملەكەتتىك ورگاندار جۇزەگە اسىراتىن ءىس-شارالاردى ءبىرتۇتاس تاربيە باعدارلاماسى اياسىندا بىرىزدەندىرۋدى جۇرگىزەدى. بۇل ءتاسىل وقۋشىلاردىڭ بويىندا ۇلتتىق جانە ازاماتتىق قۇندىلىقتاردى دامىتۋعا باعىتتالعان تاربيە جۇمىسىنىڭ ءبىرتۇتاس جۇيەسىن قۇرۋعا مۇمكىندىك بەرەدى.