كەزدەسۋ بارىسىندا وتاندىق عىلىمدى دامىتۋ ماسەلەلەرى تالقىلاندى
مەملەكەت باسشىسى بىلتىر جاڭا مارتەبە بەرىلگەن ۇلتتىق عىلىم اكادەمياسى وتاندىق عالىمداردىڭ كۇش-جىگەرىن بىرىكتىرىپ، عىلىم مەن ەكونوميكاعا ناقتى پايدا اكەلەتىن جاڭالىقتار ەنگىزۋگە ەرەكشە ءمان بەرۋگە ءتيىس ەكەنىن اتاپ ءوتتى، دەپ حابارلايدى اlmaty-akshamy.kz.
قاسىم-جومارت توقايەۆ ۇلتتىق عىلىم اكادەمياسىنىڭ جاڭا مۇشەلەرىن سايلاۋ پروسەسىن جەدەلدەتۋ، اكادەميا جۇمىسىنا تالانتتى جاس عالىمدار مەن جاڭا مامانداردى كەڭىنەن تارتۋ قاجەت ەكەنىنە نازار اۋداردى.
سونىمەن قاتار پرەزيدەنتكە اقىلبەك كۇرىشبايەۆ ءوزى باسقاراتىن قازاق ۇلتتىق اگرارلىق زەرتتەۋ ۋنيۆەرسيتەتىنىڭ عىلىمي زەرتتەۋلەرىن جانە اگروونەركاسىپ سالاسىن جەتىلدىرۋگە باعىتتالعان جۇمىستارىن تانىستىردى.
مەملەكەت باسشىسىنىڭ پىكىرىنشە، وقۋ ورنىنا زەرتتەۋ ۋنيۆەرسيتەتى مارتەبەسىنىڭ بەرىلۋى اگرارلىق سەكتورداعى عىلىمي ازىرلەمەلەردى ناقتى وندىرىسكە ەنگىزۋگە، عىلىمي زەرتتەۋلەردىڭ ناتيجەسىن كوممەرسيالاندىرۋعا مۇمكىندىك بەرەدى.
كەزدەسۋ سوڭىندا قاسىم-جومارت توقايەۆ جاڭا مىندەتتەردى ەسكەرە وتىرىپ، ۇلتتىق عىلىم اكادەمياسىن دامىتۋ ستراتەگياسى مەن جۇمىس جوسپارىن پىسىقتاۋدى تاپسىردى. سونىمەن قاتار قازاقستان عىلىم اكادەمياسىنىڭ نەگىزىن قالاعان قانىش ساتبايەۆتىڭ 125 جىلدىعىنا ارنالعان ءىس-شارالاردى جوعارى دەڭگەيدە ۇيىمداستىرۋ ماڭىزدى ەكەنىن ايتتى.