مەملەكەت باسشىسى قاسىم-جومارت توقايەۆ تۇركيا پرەزيدەنتى رەجەپ تاييپ ەردوعانمەن كەزدەستى
مەملەكەت باسشىسى تۇركيا پرەزيدەنتىنىڭ قازاقستانعا ساپارىنىڭ ءمانى زور ەكەنىن اتاپ ءوتىپ، بۇگىنگى كەزدەسۋ ەكى ەلدىڭ كوپجاقتى قارىم-قاتىناسىن نىعايتۋعا جانە تۇركى الەمىن دامىتۋعا تىڭ سەرپىن بەرەتىنىنە نازار اۋداردى.
قاسىم-جومارت توقايەۆ سامميت بارىسىندا كوتەرگەن ماڭىزدى باستامالارى مەن سالماقتى وي-پىكىرلەرى ءۇشىن رەجەپ تاييپ ەردوعانعا العىس ايتتى.
– ءقادىرلى باۋىرىم، اتاجۇرتقا قوش كەلدىڭىز! تۇركيا – ءبىزدىڭ ەجەلدەن ەنشىسى ءبىر، تامىرلاس تۋىسىمىز. سونداي-اق قازاقستاننىڭ ەڭ جاقىن ءارى سەنىمدى ستراتەگيالىق سەرىكتەسى. ءسىز ءوزارا قارىم-قاتىناستى دامىتۋعا وراسان زور ۇلەس قوسىپ كەلەسىز. مەن ونى جوعارى باعالايمىن. اراداعى تۇراقتى كەلىسسوزدەردىڭ ارقاسىندا بۇگىندە كوپتەگەن كەلىسىمدەرىمىز تابىستى جۇزەگە اسىرىلۋدا. بىلتىر ەكىجاقتى تاۋار اينالىمى 54 پايىزعا ءوسىپ، 6،3 ميلليارد دوللار بولدى. وسى كورسەتكىشتى 10 ميلليارد دوللارعا دەيىن جەتكىزۋدى كوزدەپ وتىرمىز. تۇركيا – ەلىمىزدىڭ نەگىزگى ءتورت ساۋدا سەرىكتەسىنىڭ ءبىرى. ينۆەستيسيالىق ىنتىماقتاستىق قارقىندى دامىپ كەلەدى. ەلىمىزدە تۇرىك كاپيتالىنىڭ ۇلەسى بار 4300-دەن استام كومپانيا جۇمىس ىستەپ جاتىر، – دەدى قاسىم-جومارت توقايەۆ.
كەزدەسۋدە قاسىم-جومارت توقايەۆ رەجەپ تاييپ ەردوعاندى جانە تۇرىك حالقىن تۇركيانىڭ 100 جىلدىعىمەن قۇتتىقتادى. سونداي-اق مەملەكەت باسشىسى باۋىرلاس ەلدىڭ مەرەيتويىنا وراي استانادا انادولى كوشەسىن، شىمكەنتتە تۇركيا داڭعىلى مەن ساياباعىن جانە الماتىدا مۇستافا كەمال اتاتۇرىكتىڭ ەسكەرتكىشىن اشۋ جوسپارلانىپ وتىرعانىن ايتتى.