اباي ۋنيۆەرسيتەتى 95 جىلدىعىن تويلادى
اباي اتىنداعى قازاق ۇلتتىق اكادەميالىق وپەرا جانە بالەت تەاترىندا قازاقتىڭ وسىناۋ باس اقىنىنىڭ اتىن يەمدەنگەن قازاق ۇلتتىق پەداگوگيكالىق ۋنيۆەرسيتەتىنە 95 جىل تولۋىنا وراي مەرەكەلىك شارا ءوتتى.
اتالعان ءبىلىم ورداسى – ەلىمىزدە اشىلعان ەڭ ءبىرىنشى جوعارى وقۋ ورنى. وعان قوسا، اباي اتىنداعى قازاق ۇلتتىق پەداگوگيكالىق ۋنيۆەرسيتەتى جوعارى جانە جوعارى وقۋ ورنىنان كەيىنگى ءبىلىم بەرۋ سالاسىنداعى ءىرى عىلىمي جانە پەداگوگيكالىق ءبىلىم بەرۋ ورتالىعى. ۋنيۆەرسيتەتتىڭ قالىپتاسۋىنا ۇلت زيالىلارى – احمەت بايتۇرسىن ۇلى، حالەل دوسمۇحامەدوۆ، تەمىربەك جۇرگەنوۆ، ساكەن سەيفۋللين، باسقا دا كوپتەگەن كورنەكتى قايراتكەرلەر زور ۇلەس قوستى.
95 جىلدىق تاريحىندا ءبىلىم مەن عىلىمنىڭ قارا شاڭىراعى بۇگىنگى كۇنگە دەيىن ءوز التىن ۇياسىنان وتاندىق پەداگوگيكانىڭ دامۋىنا تىڭ سەرپىن بەرىپ، 200 مىڭعا جۋىق پەداگوگ پەن 4 مىڭنان اسا عىلىمي كادردى قاناتتاندىردى. بۇگىندە ۋنيۆەرسيتەت الەمنىڭ 25 مەملەكەتىنىڭ 138 جوعارى وقۋ ورىندارىمەن ارىپتەستىك بايلانىستا جۇمىس ىستەيدى. اباي ۋنيۆەرسيتەتى الەمدىك جانە وتاندىق رەيتينگتەردە ۇزدىك ۋنيۆەرسيتەتتەر قاتارىندا.
«ۋنيۆەرسيتەتتىڭ 95 جىلدىعى – جوو-نىڭ وسىعان دەيىن جەتكەن جەتىستىگىن تۇيىندەپ، پىسىقتاپ، الداعى ۋاقىتتاعى جۇمىستاردى جوسپارلاۋعا قولايلى مەجە. دەمەك، بۇگىنگى سالتاناتتى شارادا بىرىنشىدەن، ۋنيۆەرسيتەتتىڭ پروفەسسورلىق-وقىتۋشىلىق قۇرامى ماراپاتتالىپ، قوشەمەتتەلدى. ەكىنشىدەن، بۇل مەرەكە – ۋنيۆەرسيتەتتىڭ ءار جىلدارعى تۇلەكتەرى مەن وسى كۇنگى وقىپ جۇرگەن ستۋدەنتتەر قاۋىمىنا وقۋ ورنىنىڭ جەتكەن جارقىن جەتىستىكتەرى مەن الدا كۇتىپ تۇرعان ماقسات-مەجەلەرىن كورسەتۋگە مۇمكىندىك بەرەتىن سىندارلى ءسات.
ۋنيۆەرسيتەتتىڭ ىرگەتاسىن قالاعان تۇڭعىش رەكتورى سانجار اسفەندياروۆ، احاڭ – احمەت بايتۇرسىن ۇلى سىندى ارىستارىمىزدىڭ، ۇلى مۇحاڭ – مۇحتار اۋەزوۆ، كوپ جىلدار بويى ۋنيۆەرسيتەت رەكتورى بولعان كەڭەس وداعىنىڭ باتىرى مالىك عابدۋللين ءتارىزدى عۇلاما عالىم، ۇلاعاتتى ۇستازداردىڭ وسى ۋنيۆەرسيتەتتە ساباق بەرىپ، اكىمشىلىك قىزمەت اتقارعانىنىڭ ءوزى بىزگە ۇلكەن ماقتانىش، سونىمەن بىرگە زور جاۋاپكەرشىلىك تە جۇكتەيدى، – دەدى اباي اتىنداعى قازۇپۋ-دىڭ باسقارما ءتوراعاسى – رەكتورى بولات تىلەپ.