قازاقستان پرەزيدەنتى استاناعا رەسمي ساپارمەن كەلگەن تۇرىكمەنستان مينيسترلەر كابينەتى ءتوراعاسىنىڭ ورىنباسارى – سىرتقى ىستەر ءمينيسترى راشيد مەرەدوۆتى قابىلدادى.
مەملەكەت باسشىسى تۇرىكمەن ديپلوماتىنا ءىلتيپات بىلدىرە وتىرىپ، دوستىق، تاتۋ كورشىلىك جانە ستراتەگيالىق سەرىكتەستىك رۋحىندا نىعايىپ كەلە جاتقان قازاق-تۇرىكمەن قاتىناستارىنىڭ قازىرگى جاي-كۇيىنە وڭ باعا بەردى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.
"ءبىز تۇرىكمەنستاندى سەنىمدى ستراتەگيالىق سەرىكتەس جانە تاريحي تۇرعىدان تۋىس مەملەكەت رەتىندە قاراستىرامىز. شىن مانىندە، سوڭعى جىلدارى ەلدەرىمىز اراسىنداعى ىنتىماقتاستىق قارىشتاپ دامىپ، سونىڭ ىشىندە ەكونوميكانىڭ ستراتەگيالىق سالالارى تىڭ قارقىن الدى"، – دەدى پرەزيدەنت.
قاسىم-جومارت توقايەۆ ورايلى ءساتتى پايدالانا وتىرىپ، تۇرىكمەنستان پرەزيدەنتى سەردار بەردىمۇحامەدوۆ پەن تۇرىكمەن حالقىنىڭ ۇلتتىق كوشباسشىسى، حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆكە ىزگى تىلەگىن جولدادى.
راشيد مەرەدوۆ ءداستۇرلى تۇردە قۇرمەت كورسەتكەنى ءۇشىن قازاقستان پرەزيدەنتىنە العىس ايتىپ، مەملەكەتارالىق بايلانىستاردىڭ بارلىق باعىتى بويىنشا استانامەن اراداعى ەكىجاقتى ىنتىماقتاستىقتى ودان ءارى كەڭەيتۋگە اشحابادتىڭ بەيىلدى ەكەنىن راستادى.
كەزدەسۋدە ساۋدا-ەكونوميكا، ەنەرگەتيكا جانە كولىك-لوگيستيكا سالالارىنداعى ءىرى جوبالاردىڭ جۇزەگە اسىرىلۋ بارىسى تالقىلاندى. سونداي-اق اتالعان جوبالاردى تولىقتاي ىسكە اسىرۋ ماڭىزدى ەكەنى اتاپ ءوتىلىپ، بۇل باۋىرلاس مەملەكەتتەر اراسىنداعى قارىم-قاتىناستارعا جاڭا سيپات بەرەتىنى جايىندا ايتىلدى.
بۇدان بولەك، جىلدان-جىلعا تىڭ مازمۇنمەن بايىپ كەلە جاتقان مادەني-گۋمانيتارلىق سالاداعى ىقپالداستىققا باسا ءمان بەرىلدى.
قاسىم-جومارت توقايەۆ پەن راشيد مەرەدوۆ وڭىرلىك جانە حالىقارالىق كۇن تارتىبىندەگى وزەكتى ماسەلەلەردى تالقىلاپ، جوعارى دەڭگەيدەگى بايلانىستاردىڭ الداعى كەستەسىن قاراستىردى.