سونىمەن بىرگە، اكىم ارداگەرلەر كەڭەسىن قارجىلاندىرۋدى ۇلعايتۋدى تاپسىردى.
الماتى اكىمى ەربولات دوسايەۆ قارتتار كۇنىنە وراي ارداگەرلەردىڭ الماتى كەڭەسىنىڭ ءتوراعاسى احان بيجانوۆ باستاعان قالالىق ارداگەرلەر كەڭەسى ءتورالقاسىنىڭ مۇشەلەرىمەن كەزدەسۋ وتكىزدى، دەپ حابارلايدى Almaty-akshamy.kz.
وتىرىستى اشقان ەربولات دوسايەۆ جاستاردى رۋحاني-ادامگەرشىلىك تاربيەلەۋ ماسەلەلەرىندە اعا بۋىننىڭ ماڭىزدى ءرول اتقاراتىنىن اتاپ ءوتتى. ارداگەرلەر كەڭەسى زەينەتكەرلەر اراسىندا مادەني-بۇقارالىق، سپورتتىق، تانىمدىق ءىس-شارالاردى ۇيىمداستىرۋعا،سونداي-اق قالانىڭ بارلىق قوعامدىق-ساياسي ءىس-شارالارىنا بەلسەندى تۇردە قاتىسادى.
«سىزدەر ءبىزدىڭ داستۇرلەرىمىز بەن تاريحىمىزدىڭ مۇرا ەتكەن ءارى ۇلكەن ومىرلىك تاجىريبەنى، اقىل - پاراساتتى يەلەنگەن زيالى تۇلعاسىزدار. قالا اكىمدىگى ءوز تاراپىنان ءبىزدىڭ ەگدە جاستاعى تۇرعىندارىمىزعا قامقورلىق پەن كومەكتى كورسەتۋ ءۇشىن قولدان كەلگەننىڭ ءبارىن جاساۋدا»، - دەدى قالا اكىمى جانە ءتورالقا مۇشەلەرىن قارتتار كۇنىمەن قۇتتىقتادى.
كەزدەسۋ بارىسىندا الماتىدا قارتتاردى الەۋمەتتىك قولداۋ، زەينەتكەرلەرگە مەديسينالىق قىزمەت كورسەتۋ جانە ساناتوريي-ساۋىقتىرۋ شارالارىنا نازار اۋدارىلدى. جىل باسىنان بەرى الماتى اكىمدىگى 19 مىڭنان استام زەينەتكەرگە ساناتوريي-ساۋىقتىرۋ بويىنشا كومەك كورسەتتى، كوممۋنالدىق قىزمەتتەرگە جالپى سوماسى 900 ملن.تەڭگەلىك تاريفتەر وتەلدى. «بەلسەندى ۇزاق ءومىر ءسۇرۋ» قالالىق باعدارلاماسى اياسىندا قالانىڭ بارلىق اۋداندارىندا بەلسەندى ۇزاق ءومىر ءسۇرۋدىڭ 10 ورتالىعى جۇمىس ىستەيدى، وندا ەگدە جاستاعى ادامدارعا مەديسينالىق، وقىتۋ جانە مادەني قىزمەتتەردەن باستاپ ارنايى قىزمەتتەر كەشەنى كورسەتىلەدى. اعىمداعى جىلدىڭ باسىنان بەرى ورتالىقتارعا 50 مىڭنان استام ادام كەلدى. ورتالىقتار اشىلعان كۇننەن باستاپ 1742 زەينەتكەرگە مەديسينا، ءبىلىم بەرۋ، بوس ۋاقىتتى قوسا العاندا، ناقتى باعىتتار بويىنشا 49 مىڭعا جۋىق ءتۇرلى الەۋمەتتىك قىزمەتتەر كورسەتىلدى.
الماتى ارداگەرلەر كەڭەسىنىڭ ءتوراعاسى اقان بيجانوۆ بۇگىنگى تاڭدا كەڭەس 237 مىڭ ادامدى بىرىكتىرەتىنىن ايتتى. ۇيىم ۇوس ارداگەرلەرىنە، تىل ەڭبەككەرلەرىنە جانە سوعىستى باستان وتكەرگەندەرگە قولداۋ كورسەتەدى. سونىمەن قاتار، زەينەتكەرلەر ءۇشىن ءتۇرلى ءىس-شارالار وتكىزىلەدى. وتكەن جىلى كەڭەس ۇيىمداستىرعان ءىس-شارالارعا 52 مىڭنان استام زەينەتكەر قاتىستى. سونىمەن قاتار، اعا بۋىن «شىڭعا ورلەۋ» قالالىق باعدارلاماسىن ورىنداۋعا بەلسەندى قاتىسادى، وندا ارداگەرلەر تاربيە جۇمىسىنىڭ ءتۇرلى باعىتتارى بويىنشا از قامتىلعان وتباسىلاردان شىققان بالالارمەن سىنىپتان تىس ساباقتار مەن كەزدەسۋلەر وتكىزەدى.
اۋدانداردا جۇرگىزىلىپ جاتقان جۇمىستار تۋرالى جانە ءوز ۇسىنىستارىمەن المالى اۋداندىق ارداگەرلەر كەڭەسىنىڭ ءتوراعاسى باتاي قابىلوۆ، ناۋرىزباي اۋداندىق كەڭەسىنىڭ ءتوراعاسى مادەنيەت قاركەنوۆ ءسوز سويلەدى.
تالقىلاۋ قورىتىندىسى بويىنشا الماتى اكىمى ەربولات دوسايەۆ بەلسەندى ۇزاق ءومىر ءسۇرۋ ورتالىقتارىنىڭ وڭ تاجىريبەسىن كەڭەيتۋدى تاپسىردى.
«ۇزاق ءومىر ءسۇرۋ ورتالىقتارى اعا بۋىن ازاماتتارىنىڭ الەۋەتىن ىسكە اسىرۋ، ۇزاق ءومىر ءسۇرۋدى ىنتالاندىرۋ جانە ولاردى بەلسەندى قوعامدىق قىزمەتكە تارتۋ ءۇشىن جاقسى قۇرالعا اينالدى»، - دەپ اتاپ ءوتتى اكىم جانە اۋدان اكىمدەرىنە حالىقتىڭ ءوسىمىن ەسكەرە وتىرىپ قامتۋدى تالداۋدى جانە قوسىمشا ورتالىقتار اشۋ جوبالارىن ازىرلەۋدى تاپسىردى.
جالپى، ورتالىقتاردا ەگدە جاستاعى ادامداردى ساباقتارمەن جانە بوس ۋاقىتپەن قامتۋدى 2 ەسەگە ارتتىرۋ جوسپارلانۋدا.
ەربولات دوسايەۆ ساناتوريي-ساۋىقتىرۋ ەمىنە كۆوتالاردى قوسىمشا ۇلعايتۋ ماسەلەسىن پىسىقتاۋدى تاپسىردى (اعىمداعى نورمالارعا سايكەس الداعى جىلى كەمىندە 3000 ارداگەر كۆوتالاردى پايدالانا الادى، 2022 جىلى بۇل قىزمەتتى 2230 ادام قولداندى). ەگدە جاستاعى ادامداردى قولداۋ شارالارىن ودان ءارى دامىتۋ ءۇشىن قالا اكىمى «ارداگەرلەردى قولداۋ جونىندە كەشەندى ءىس-شارالار وتكىزۋ» جوباسىن مەملەكەتتىك الەۋمەتتىك تاپسىرىس اياسىندا قارجىلاندىرۋ كولەمىن ۇلعايتۋ مۇمكىندىگىن قاراستىرۋدى، سونداي-اق ءتۇرلى اكىمشىلىك كەدەرگىلەردى جويۋ ءۇشىن قۇجاتتار توپتاماسىن ءۇش جىل ىشىندە ءبىر اق رەت قاراۋعا كوشۋدى تاپسىردى. ارداگەرلەر ءۇشىن مەملەكەتتىك الەۋمەتتىك تاپسىرىستىڭ قۇنى سوڭعى رەت 5 جىل بۇرىن قايتا قارالعانىن اتاپ وتەمىز.
ەسكە سالساق، الماتىدا قارتتار ايلىعى اياسىندا قالانىڭ بارلىق اۋداندارىندا مادەني-دەمالىس، سپورتتىق ءىس-شارالار جالعاسۋدا.