مەملەكەت باسشىسى سۋ تاسقىنىنان زارداپ شەككەن جاندارعا كومەك كورسەتكەنى ءۇشىن الماتىلىق وقۋشى داۋلەن باۋىرجانۇلىنا ريزاشىلىعىن ءبىلدىردى

الماتى اكىمى ەربولات دوسايەۆ مەملەكەت باسشىسى قاسىم-جومارت توقايەۆتىڭ اتىنان اقمولا وبلىسىنداعى سۋ تاسقىنىنان زارداپ شەككەن جاندارعا كومەك كورسەتكەنى ءۇشىن 3-سىنىپ وقۋشىسى داۋلەن باۋىرجانۇلىنا العىس حات تابىس ەتتى، دەپ حابارلايدى Almaty-akshmy.kz

قازاقستان پرەزيدەنتى 9 جاستاعى داۋلەننىڭ يگى ءىسىن جوعارى باعالاپ، ونىڭ ارەكەتىن ناعىز وتانشىلدىقتىڭ ۇلگىسى دەپ اتادى. قاسىم-جومارت توقايەۆ العىس حاتىندا بالانىڭ بويىنا اسىل قاسيەت دارىتقان اتا-اناسى مەن ۇستازدارىنا ريزاشىلىعىن ءبىلدىردى.

پرەزيدەنت داۋلەن سياقتى اقىلدى ءارى زەرەك بالالار بار ەلدىڭ بولاشاعى جارقىن ەكەنىن ەرەكشە اتاپ ءوتتى.

الماتى ق. ش. ءۋاليحانوۆ اتىنداعى №12 گيمنازيانىڭ 3-سىنىپ وقۋشىسى داۋلەن باۋىرجان ۇلى زياتكەرلىك وليمپياداعا قاتىسۋ ءۇشىن Qalan.kz پورتالىنا تىركەلدى. جەڭىسى ءۇشىن بەرىلگەن بونۋستارىن جيناعان. الەۋمەتتىك جەلىلەردە سۋ تاسقىنىنان زارداپ شەككەن تۇرعىنداردىڭ سۋرەتىن كورىپ، ويلانباستان كومەكتەسۋگە شەشىم قابىلداپ، جينالعان 25 مىڭ تەڭگەسىن ارنايى قورعا جىبەرگەن. 

«ەلىمىزدە بولىپ جاتقان تابيعي اپات تۋرالى ەستىپ، كومەكتەسكىم كەلدى. مەن جينالعان بارلىق اقشانى كومەك رەتىندە جىبەرۋدى شەشتىم. الدىمەن مۇنى اتا-اناما ايتىپ ەدىم، ولار مەنىڭ بۇل ويىمدى بىردەن قولدادى»، - دەدى داۋلەن.

داۋلەننىڭ ءمۇعالىمى ساعادات جۇبانىشبەكوۆانىڭ ايتۋىنشا، ساباقتى ۇزدىك وقيدى، ماتەماتيكا، ينفورماتيكا، جاراتىلىستانۋ عىلىمدارىن جاقسى كورەدى. بىرنەشە رەت «التىن ساقا»، «كەنگۋرۋ»، «اقبوتا» وليمپيادالارىنىڭ جەڭىمپازى اتانعان.