الەۋمەتتىك جەلىلەردە ەنە مەن كەلىننىڭ بەتاشار راسىمىندەگى ارەكەتى قىزۋ تالقىعا ءتۇسىپ، جۇرتشىلىقتىڭ اشۋىن تۋدىردى، دەپ حابارلايدى اlmaty-akshamy.kz.
بەينەجازبادا كەلىننىڭ بەتىن اشقان ۇلكەن كىسى شوكولادتىڭ جارتىسىن ءوزى تىستەپ، قالعان جارتىسىن كەلىنىنە بەرگەنى بايقالادى.
بۇل ەرەكشە «ءتاتتى سۇيىسكە» ەتنوگراف بولات بوپاي ءوز پىكىرىن ءبىلدىردى.
- ەنە مەن كەلىننىڭ اۋىز جالاسۋى قازاقتىڭ ىرىم-تىيىمىندا جوق. قازاق ەجەلدەن دەنساۋلىققا، تازالىققا ەرەكشە ءمان بەرگەن، ەر مەن ايەلدىڭ ورامالىن اۋىستىرماعان. كەلىن مەن ەنەگە ارنالعان جەكە ورامالدارى بولعان. ۆيدەونى كورىپ وتىرىپ، مۇنداي ءداستۇردىڭ بولماعانىن سەنىمدى تۇردە ايتا الامىن. ءۇندى كينولارىندا قۋانىشتى ساتتەردە كامپيتتى ءبولىسىپ جەيتىنىن كورگەن ەدىم. بۇل ادەتتى سولاردان الدى ما، الدە وزدەرى ويلاپ تاپتى ما، بىلمەيمىن. مۇنداي ارەكەت حالىقتىڭ مادەنيەتىنە، داستۇرىنە، ىرىم-تىيىمدارىنا قايشى كەلەدى، عاسىرلار بويى قالىپتاسقان تاعىلىمدى بۇزۋ دەپ ويلايمىن. ەكىنشىدەن، دەم مەن سىلەكەي ارقىلى گەننىڭ اۋىسۋى جۇرەدى. ۇشىنشىدەن، گيگيەنا تۇرعىسىنان جۇقپالى اۋرۋلاردىڭ تارالۋ ءقاۋپى بار. ەنە مەن كەلىننىڭ اراسىندا سىيلاستىق بولۋ كەرەك. مەن ءوز باسىم ەتنوگراف، ەل اعاسى رەتىندە ايتارىم - بولماعان نارسەنى ءسالت-داستۇر دەپ قابىلداۋعا بولمايدى، - دەيدى ەتنوگراف بولات بوپاي.
بۇل وقيعا قوعامدا ءارتۇرلى پىكىرلەر تۋدىرىپ، ءداستۇر مەن زاماناۋي ادەت-عۇرىپتار اراسىنداعى شەكارانى انىقتاۋ ماسەلەسىن تاعى دا كوتەردى.