مەملەكەت باسشىسى سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆتى قابىلدادى، دەپ حابارلايدى اقوردا كز.
كەزدەسۋ بارىسىندا پرەزيدەنت سۋ رەسۋرستارىن باسقارۋ ماسەلەلەرى بويىنشا ورتالىق ازيا ەلدەرىمەن ءوزارا ىس-ارەكەتتى جولعا قويۋ ماڭىزدى ەكەنىن اتاپ ءوتتى.
مينيسترلىككە سۋ شارۋاشىلىعى ينفراقۇرىلىمدارىن كەڭ كولەمدە جاڭعىرتۋ، سۋدى ەسەپتەۋ جانە ءبولۋ جۇيەسىن سيفرلاندىرۋ مىندەتى جۇكتەلدى.
مەملەكەت باسشىسى سۋ رەسۋرستارىن ءتيىمسىز پايدالانۋعا جانە گيدروتەحنيكالىق نىسانداردىڭ ابدەن توزۋىنا قاتىستى ماسەلەلەردى شەشۋ ءۇشىن جاڭا سۋ كودەكسىن ۋاقتىلى قابىلداۋ قاجەتتىگىن ايتتى.
قاسىم-جومارت توقايەۆ ۇلتتىق گيدروگەولوگيالىق قىزمەتتى قايتا قۇرۋ جانە مينيسترلىككە قاراستى ۇيىمداردى ترانسفورماسيالاۋ جۇمىستارىن اياقتاۋدى تاپسىردى.