وقيعا اباي داڭعىلى مەن ناۋرىزباي باتىر كوشەسىنىڭ قيىلىسىندا بولعان.
وقيعا كۋاگەرلەرىنىڭ ايتۋىنشا، 6 قىركۇيەك كۇنى ءتۇس اۋا №79 جولاۋشىلار اۆتوبۋسى اباي داڭعىلىنىڭ بويىمەن شىعىس باعىتتا جۇرگەن. سالوندا جولاۋشىلار بولماعان. جۇرگىزۋشى اۆتوبۋستى ناۋرىزباي باتىر كوشەسىمەن قيىلىستاعى ارنايى جولاققا توقتاتىپ، اجەتحاناعا بارۋ ءۇشىن شىعىپ كەتكەن.
قايتىپ ورالعان جۇرگىزۋشى ءوزى جوقتا قاراۋسىز قالعان اۆتوبۋستىڭ ۇلكەن اپاتقا سەبەپ بولعانىن كورگەن. ول باقىلاۋسىز ارتقا ءجۇرىپ كەتىپ، قيىلىستان ءوتىپ، باعدارشام جانۋىن كۇتىپ تۇرعان كولىكتەرگە سوقتىعىسقان.
كەيىن پوليسيا اۆتوبۋس 84 مەتر جول جۇرگەنىن انىقتادى. اۆتوبۋستىڭ سوققىسىنا العاش بوپ ۇرىنعان Land Cruiser كولىگى بولدى. ول كۇشتى سوققىدان Kia Rio مەن Chevrolet Cobalt-كە زاقىم كەلتىرگەن. ودان كەيىن اۆتوبۋس جول قيىلىسىندا تۇرعان Kia Optima كولىگىنە سوعىلدى.
اپات سالدارىنان Kia Rio كولىگىندە بولعان ءبىر ايەل زارداپ شەكتى. ول اۋرۋحاناعا جاتقىزىلدى. باقىتىمىزعا وراي، اۆتوبۋستىڭ جولىندا جاياۋ جۇرگىنشىلەر، سالوندا جولاۋشىلار بولماعان. جول پوليسياسىنىڭ قىزمەتكەرلەرى وقيعانىڭ بارلىق ءمان-جايىن انىقتاپ جاتىر.