بۇگىن، 2026 جىلدىڭ 9 قاڭتارىندا پرەزيدەنت قاسىم-جومارت توقايەۆ سيفرلىق كودەكسكە قول قويدى، دەپ حابارلايدى اqshamnews.kz ءتىلشىسى.
ايتا كەتەيىك، سيفرلىق كودەكستى پارلامەنت بىلتىر كۇزدە قابىلداعان بولاتىن.
ءماجىلىس دەپۋتاتى، «AMANAT» پارتياسى فراكسياسىنىڭ مۇشەسى، ەكونوميكالىق رەفورما جانە وڭىرلىك دامۋ كوميتەتىنىڭ ءتوراعاسى نۇرتاي سابيليانوۆتىڭ ايتۋىنشا، سيفرلىق كودەكس جوباسى مەن ەكى ىلەسپە زاڭ جوباسى پرەزيدەنتتىڭ 2023 جىلعى 1 قىركۇيەكتەگى قازاقستان حالقىنا جولداۋىن ىسكە اسىرۋ ماقساتىندا ازىرلەنگەن. كودەكس جوباسى مەن ىلەسپە زاڭ جوبالارىنا پارلامەنت دەپۋتاتتارى باستاماشىلىق ەتكەن.
"سيفرلىق كودەكستىڭ جوباسى 10 تاراۋدان تۇرادى. كودەكس جوباسى سيفرلىق ورتاداعى قاتىناستاردى، ونىڭ ىشىندە قۇقىقتىق قاتىناس وبەكتىلەرىنىڭ تۇرلەرى، سيفرلىق ورتا سۋبەكتىلەرى، سيفرلىق سايكەستەندىرۋ جانە باقىلاۋ، تاۋەكەلدەردى باسقارۋ بويىنشا قاتىناستاردى رەتتەۋگە، سيفرلىق ورتادا جەكە ادامنىڭ، قوعامنىڭ جانە مەملەكەتتىڭ قاۋىپسىزدىگىن قامتاماسىز ەتۋگە باعىتتالعان"، - دەگەن ەدى سابيليانوۆ ءماجىلىستىڭ جالپى وتىرىسىندا.
ال ىلەسپە زاڭ جوبالارىندا مەملەكەتتىك قىزمەت كورسەتۋدىڭ قاعيداتتارىن ايقىنداۋ جانە ساقتاۋ جونىندە تولىقتىرۋلار، مەملەكەتتىك قىزمەت كورسەتۋ سالاسىنداعى زاڭنامالىق اكتىلەردە بەلگىلەنگەن تالاپتاردى ساقتاماعانى ءۇشىن اكىمشىلىك جاۋاپكەرشىلىك ەنگىزۋ كوزدەلگەن.
كوميتەت زاڭ جوبالارى بويىنشا قورىتىندى ازىرلەيدى.